АҚШ президенти Жо Байденнинг Делавер штати Уилмингтон шаҳридаги уйида махфий ҳужжатлар аниқланди. Бу ҳақда Fox News хабар берди.
Маълум қилинишича, махфий ҳужжатлар гараждаги омборхонадан топилган, улар аслида архивда сақланиши керак бўлган. Ноябрь ойида ҳам Байденнинг адвокатлари Вашингтондаги дипломатия ва глобал ҳамкорлик марказининг қулфланган кабинетида ўнга яқин махфий ҳужжатларни топган. Улар орасида Америка разведкаси ҳамда Украина, Эрон ва Буюк Британияга оид брифинглар материаллари бўлган.
Байденнинг шахсий адвокати Ричард Собернинг айтишича, гаражда сақланадиган шахсий ва сиёсий ҳужжатлар орасида Обама маъмуриятига оид бир қанча махфий ҳужжатлар бор. Гаражга туташ хонада ҳужжатнинг яна бир саҳифаси топилган. Ҳужжатларнинг мазмуни ҳақида адвокат ҳеч нарсани очиқламаган.
Байденнинг ходимлари ҳужжатлар ҳақида зудлик билан Адлия вазирлигига хабар бериб, барча ҳужжатларни унга топширган. Президентнинг Делавердаги Rexобот-Бичдаги яна бир уйи текширилган, лекин у ерда ҳеч қандай махфий материал топилмаган.
Байден унинг кўрсатмаси билан адвокатлари 2017—2021 йилларда у давлат лавозимини эгалламаган пайтда фойдаланган барча биноларни текширган ва бу текширув эндигина якунланганини айтган. Унинг сўзларига кўра, ҳужжатлар унинг шахсий кутубхонасида ва қулфланган гаражда бўлган, «кўчада эмас».
«Одамлар менинг махфий маълумотларга жиддий қарашимни билади», — деган АҚШ президенти.
Дастлабки бир нечта ҳужжатлар офисдаги қоғозларни саралаш пайтида топилган. ФҚБ ва АҚШ Адлия вазирлиги махфий ҳужжатлар билан ишлаш қоидани бузишини баҳоламоқда. Қонунга кўра, Оқ уйнинг барча ёзувлари ва ундан ҳам кўпроқ махфий материаллар амалдаги маъмурият муддати тугаганидан кейин АҚШ Миллий архивига топширилиши керак.
2022 йил августида Трампнинг уйидан махфий маълумотлардан иборат ҳужжатлар топилганди. Собиқ президент «Жосуслик тўғрисидаги қонун»ни бузганликда гумонланган ва бу иш бўйича махсус прокурор тайинланган.
Изоҳ (0)