Россия икки миллионлик армия яратишга ҳаракат қилмоқда, бунинг учун у янги сафарбарлик тўлқинларини амалга оширади. Украина Мудофаа вазирлигининг Бош разведка бошқармаси бу ҳақда маълумот берди.
Вазирлик Россиянинг режаси ҳақида маълумот бериб, сафарбарликнинг биринчи тўлқинида Россия қуролли кучлари сафига 300 минг киши чақирилганини эслатди. Улар қисқа муддатли тайёргарликдан сўнг жанг майдонига жўнатилган.
«Украина ҳарбий разведкаси Россия раҳбарияти яқин кунларда навбатдаги сафарбарлик тўлқинини эълон қилишини истисно этмайди. Яна 500 минг россиялик Россия қуролли кучлари сафига қўшилиб, давлатга стратегик захиралар яратиш имконини беради», — дейилади развдкаси баёнотида.
Таъкидланишича, Россия аллақачон сафарбарликнинг янги тўлқинини эълон қилишга фаол тайёргарлик кўрмоқда. Бунинг учун улар чақирувни ўтказишни тартибга солувчи қонунларга ўзгартиришлар киритмоқда, ўқув марказларини тайёрламоқда.
«Украина ҳарбий разведкасининг ҳисоб-китобларига кўра, Россия томонидан амалга оширилган сафарбарлик тадбирлари кўлами Кремль раҳбариятининг икки миллионга яқин армия яратиш режаларидан далолат беради», — дея қўшимча қилинади хабарда.
11 январь куни Россия Давлат думаси мудофаа қўмитаси аъзоси, генерал-лейтенант Виктор Соболев мамлакатдаги барча ёшларни мажбурий ҳарбий тайёргарликдан ўтишга чақирган. У Россияда «НАТО билан кенг кўламли уруш» олиб бориш учун сафарбарлик захираси мавжуд эмаслигини қайд этган. Соболев сафарбарлик қўшинлари базасини тиклаш ва ўқув машғулотларини ўтказиш, шунингдек, Россияда ёшларнинг 100 фоиз ҳарбий мутахассисликка эга бўлишини таъминлашга чақирганди.
Изоҳ (0)