НАТО Руминия пойтахти Бухарестга АWACS ҳаводан огоҳлантириш ва назорат қилиш тизимига эга самолётларни жойлаштиради, улар «Россиянинг ҳарбий фаолияти ортидан кузатади» ва минтақада НАТОнинг кучли иштирокини қўллаб-қувватлайди. Бу ҳақда альянс матбуот хизмати хабар берди. Биринчи рейс 17 январь, сешанба куни етиб келади.
«Бизнинг АWACS тизимларимиз самолётларни юзлаб километр узоқликда аниқлай олади, бу уларни НАТО учун асосий тийиб турувчи ва мудофаа воситасига айлантиради», — деди матбуот котиби Оана Лунгеску.
Разведка самолётлари яқин кунларда йўлга чиқади ва фақат альянс мамлакатлари ҳудудидан учиб ўтади, уларнинг миссияси бир неча ҳафтага мўлжалланган. 2022 йилнинг февралидан бери альянс Шарқий Европа ва Болтиқ денгизида Россия ҳарбий самолётларини кузатиш учун АWACS тизимидан фойдаланмоқда.
НАТО самолётларни Германиянинг Гайленкирхендаги базасидан олиб ўтади, альянс Руминияга келадиган самолётлар сонига аниқлик киритмади. Германиянинг DPA агентлиги ҳарбий доиралардаги манбаларга таяниб хабар беришича, гап 3 та самолёт ҳақида кетмоқда. Самолётлар Руминиянинг Отопени базасига жойлаштирилади — база НАТО мамлакатининг Украина билан шарқий чегарасидан атиги 200 километр узоқликда.
Январь ойи ўрталарида Европа Иттифоқи ва НАТО етакчилари ҳамкорликни кенгайтириш тўғрисидаги декларацияни имзолаган эди. «Геостратегик рақобат кучайиб бораётган дунёда авторитар субъектлар бизнинг манфаатларимиз, қадриятларимиз ва демократик тамойилларимизга қарши чиқмоқда», — деган НАТО Бош котиби Йенс Столтенберг. Европа Кенгаши раҳбари Шарл Мишел Россия президенти Владимир Путин «НАТОнинг қисқаришини» хоҳлаётганини, бироқ Украинадаги жанглар туфайли у тескари натижага эришаётганини эслатган.
Изоҳ (0)