Қозоғистоннинг KazTransOil оператори 2023 йилнинг биринчи чорагида Transneft’нинг нефть қувур тизимлари орқали Германияга 300 минг тонна нефть етказиб беради. Тегишли рухсатнома Россия Энергетика вазирлиги томонидан берилган. Бу ҳақда «Коммерсантъ» хабар берди.
KazTransOil Россия Энергетика вазирлигидан 2023 йилнинг биринчи чорагида 300 минг тонна Қозоғистон нефтини Transneft магистрал нефть қувурлари тизими орқали Адамова Застава нефть етказиб бериш пунктига ташиш учун тасдиқлов олди», — дейилади компания хабарида.
Компаниянинг қўшимча қилишича, 300 минг тонна нефть етказиб бериш МДҲга аъзо давлатлардан Россия ҳудуди орқали нефть транзитини ўтказиш жадвалига киритилган.
Германия ҳукумати 2023 йилда Қозоғистондан «Дружба» нефть қувури орқали хом ашё импорт қилишини билдирган.
Ўз навбатида Қозоғистон энергетика вазири Болат Акчулаков Қозоғистон 2023 йилда Германияга 1,5 миллион тонна хом ашё етказиб беришни режалаштираётгани, келгусида етказиб бериш ҳажми 7 миллион тоннагача ошиши мумкинлигини маълум қилди.
Умуман олганда, ҳисоб-китобларга кўра, Қозоғистон Германияга ҳар йили Россия етказиб берадиган 19-20 миллион тонна ўрнига 3-7 миллион тоннадан кўп бўлмаган хом ашё етказиб бера олади.
29 декабрь куни Қозоғистоннинг Казмунайгаз компанияси 2023 йилда Россия орқали 1,2 миллион тонна нефть транзити учун ариза топширган. Россия Бош вазири ўринбосари Александр Новак Россия Қозоғистон сўровини маъқуллашга тайёрлигини билдирган.
KazMunayGaz Қозоғистондан Германияга хом ашё Шведт шаҳридаги нефтни қайта ишлаш заводига етказилишини тушунтирган.
Сентябргача у «Роснефть» томонидан назорат қилинган, кейин у Германия Федерал тармоқ агентлиги назоратига ўтган. Заводнинг қуввати йилига 11,6 миллион тонна нефть маҳсулотларини ишлаб чиқаришни ташкил этади.
Изоҳ (0)