Qozog‘istonning KazTransOil operatori 2023-yilning birinchi choragida Transneftning neft quvur tizimlari orqali Germaniyaga 300 ming tonna neft yetkazib beradi. Tegishli ruxsatnoma Rossiya Energetika vazirligi tomonidan berilgan. Bu haqda “Kommersant” xabar berdi.
KazTransOil Rossiya Energetika vazirligidan 2023-yilning birinchi choragida 300 ming tonna Qozog‘iston neftini Transneft magistral neft quvurlari tizimi orqali Adamova Zastava neft yetkazib berish punktiga tashish uchun tasdiqlov oldi”, — deyiladi kompaniya xabarida.
Kompaniyaning qo‘shimcha qilishicha, 300 ming tonna neft yetkazib berish MDHga a’zo davlatlardan Rossiya hududi orqali neft tranzitini o‘tkazish jadvaliga kiritilgan.
Germaniya hukumati 2023-yilda Qozog‘istondan “Drujba” neft quvuri orqali xomashyo import qilishini bildirgan.
O‘z navbatida Qozog‘iston energetika vaziri Bolat Akchulakov Qozog‘iston 2023-yilda Germaniyaga 1,5 million tonna xomashyo yetkazib berishni rejalashtirayotgani, kelgusida yetkazib berish hajmi 7 million tonnagacha oshishi mumkinligini ma’lum qildi.
Umuman olganda, hisob-kitoblarga ko‘ra, Qozog‘iston Germaniyaga har yili Rossiya yetkazib beradigan 19-20 million tonna o‘rniga 3-7 million tonnadan ko‘p bo‘lmagan xomashyo yetkazib bera oladi.
29-dekabr kuni Qozog‘istonning Kazmunaygaz kompaniyasi 2023-yilda Rossiya orqali 1,2 million tonna neft tranziti uchun ariza topshirgan. Rossiya Bosh vaziri o‘rinbosari Aleksandr Novak Rossiya Qozog‘iston so‘rovini ma’qullashga tayyorligini bildirgan.
KazMunayGaz Qozog‘istondan Germaniyaga xomashyo Shvedt shahridagi neftni qayta ishlash zavodiga yetkazilishini tushuntirgan.
Sentabrgacha u “Rosneft” tomonidan nazorat qilingan, keyin u Germaniya Federal tarmoq agentligi nazoratiga o‘tgan. Zavodning quvvati yiliga 11,6 million tonna neft mahsulotlarini ishlab chiqarishni tashkil etadi.
Izoh (0)