Туркия мудофаа вазири Хулуси Акар Украина мудофаа вазири Алексей Резников билан қўнғироқлашди. У зудлик билан ўт очишни тўхтатиш ва тинчликни қайта тиклашга чақирди.
«Учрашув чоғида вазир Акар минтақада тинчлик ва барқарорликни қайта тиклаш ҳамда янада кўпроқ қурбонлар юзага келишининг олдини олиш учун зудлик билан ўт очишни тўхтатиш муҳимлигини қайд этди», — дейилади Туркия Мудофаа вазирлиги сайтида.
Вазир Туркия Россия-Украина низосини тинч йўл билан тартибга солишда ёрдамлашишни ва «барча даражаларда» гуманитар кўмак кўрсатишда давом этишини ваъда қилди.
Шунингдек, Хулуси Акар маълум қилишича, дон битими доирасида Украина портларидан бошқа мамлакатларга 17 миллион тонна дон олиб кетилган. Унинг сўзларига кўра, Украина портларидан донни олиб чиқиш узлуксиз давом этмоқда.
Аввалроқ, 10 январь куни Туркия ташқи ишлар вазири Мавлуд Чавушўғли Анқара Украина президенти Владимир Зеленскийнинг тинчлик формуласини қўллаб-қувватлашини маълум қилган эди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди. Ушбу шартлар радиациявий ва ядровий хавфсизлик; озиқ-овқат хавфсизлиги; энергетика хавфсизлиги; барча асирлар ва депортация қилинганларнинг озод этилиши; БМТ уставининг бажарилиши ҳамда Украина ҳудудий яхлитлиги ва дунё тартибининг қайта тикланиши; Россия қўшинларининг олиб кетилиши ва жанговар ҳаракатларнинг тўхтатилиши; адолатнинг қайтарилиши; экоцид (флора ва фаунанинг йўқ қилиниши)га қарши кураш; эскалацияга йўл қўймаслик; низо якунланганининг мустаҳкамланишини ўз ичига олади.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Изоҳ (0)