Aksariyat insonlar yil boshidan o‘ziga to‘g‘ri ovqatlanishga o‘tishga va’da beradi, albatta, bu vazn yo‘qotish yoki salomatlikni yaxshilash uchun. Biroq ko‘pchilik bu fikrdan tezda voz kechadi, chunki ular natijalarni darhol ko‘rmaydi. Haqiqatan ham to‘g‘ri ovqatlanish keskin vazn yo‘qotish yoki salomatlikning yaxshilanishiga olib kelmaydi. Shunga qaramay, atigi 10 kun ichida organizmda ijobiy o‘zgarishlar ro‘y beradi, deb yozadi Marie Claire.
Ko‘pgina sog‘lom ovqatlanish tizimlarining asosiy tamoyillaridan biri ratsionda shakar va uglevodlarni cheklashdir. “Shakar miyaning mukofot faoliyatini rag‘batlantiradi, bu yanada ko‘proq shakarli mahsulotlar iste’mol qilishga majbur qiladi, — dedi parhezshunos Rob Xobson The Telegraph nashriga. — Shakarni cheklashda ba’zi odamlar charchoq, kayfiyatning tushishi va konsentratsiyaning pasayishi kabi ba’zi alomatlarga duch kelishi mumkin”.
Biroq bu faqat qisqa muddatli ta’sirlar bo‘lib, ular umumiy salomatlikning yaxshilanishi bilan to‘liq qoplanadi. Xobsonning so‘zlariga ko‘ra, shakar va tez uglevodlarni cheklash ortiqcha vaznni yo‘qotishga yordam beradi, ichak faoliyatini yaxshilaydi, energiya darajasini oshiradi va diabet hamda yurak kasalliklari xavfini kamaytiradi.
To‘g‘ri ovqatlanishga o‘tishda ko‘pchilik o‘z oldiga qo‘ygan yana bir maqsad go‘shtni rad etishdir. Ha, u ham bir necha kun ichida o‘z natijasini beradi.
Yozuvchi Reychel Amaning ta’kidlashicha, go‘shtdan voz kechganidan 10 kun o‘tgach, u o‘zini ancha yengil va baquvvat his qildi. “Ovqatdan keyin to‘ydim, lekin shu bilan birga go‘sht iste’mol qilgandan keyin paydo bo‘ladigan og‘irlik va noqulaylikni his qilmadim”, — deydi Reychel.
Ammo butunlay vegetarian bo‘lish shart emas. Yog‘li qizil go‘shtdan voz kechish ham yaxshi fikrdir. Bu ovqat hazm qilish tizimining ishiga ijobiy ta’sir qiladi, chunki parhezsunoslar go‘shtni almashtirishni tavsiya qiladigan sabzavot, meva va donlar ichaklarda foydali bakteriyalarning ko‘payishiga yordam beradi.
To‘g‘ri ovqatlanishning deyarli har bir tizimi spirtli ichimliklarni rad etishni ham talab qiladi. Bu qaror, albatta, bir qancha o‘zgarishlarga olib keladi.
Birinchidan, yuz rangi yaxshilanadi va shish yo‘qoladi, ikkinchidan, energiya va konsentratsiya darajasi oshadi. Uchinchidan, yaxshiroq uxlashni boshlaysiz. “Uyqu yaxshilanadi va ertalab o‘zingizni tetik his qilasiz”, — deydi professor Devid Natt. Bundan tashqari, professorning fikriga ko‘ra, spirtli ichimliklarsiz bor-yo‘g‘i o‘n kun ichida jigar faoliyatini tiklaydi va qon bosimi me’yorga keladi.
Izoh (0)