Украина ҳарбий қўмондонлиги вакиллари «Вагнер» хусусий ҳарбий компанияси асосчиси Евгений Пригожиннинг 11 январга ўтар кечаси унинг бўлинмалари Донецк вилоятидаги Соледар шаҳрини назорат остига олгани ҳақидаги баёнотига изоҳ берди. Бизнесменнинг матбуот хизмати у ҳарбийлар қуршовида, гўёки, ўша шаҳарда қазиладиган туз конларида тургани акс этган суратларни эълон қилганди.
Украина қуролли кучлари Шарқий гуруҳи вакили Сергей Череватий Пригожиннинг даъволарини ёлғон деб атади ва журналистларга Бош штаб эълон қиладиган тафсилотларни кутишни тавсия қилди. Бош штабининг эрталабки ахборотида Соледар Россия армияси томонида ўққа тутилишда давом этаётган аҳоли пунктлари қаторида тилга олинган, холос.
Украина қуролли кучлари Стратегик коммуникациялар бошқармасида қуйидагича изоҳ беришди: «Пригожиннинг жойлашган жойи, афтидан ҳақиқатга тўғри келмайди, у Соледар конларида эмас. Бу Пригожиннинг пиарчилари томонидан ичи аудиторияга қаратилган ва маҳбуслар орасидаги катта талафотларни қандайдир қилиб оқлаш мақсадидаги ахборот-руҳий операция элементидир».
Муассаса ижтимоий тармоқларга учта фотосуратни жойлади. Биринчисида Соледар туз конлари акс этган, иккинчисида эса ДХР назорати остидаги Владимировка қишлоғи ҳудудидаги ғорларни кўриш мумкин. Учинчиси Пригожиннинг матбуот хизмати томонидан 11 январга ўтар кечаси Соледар қўлга олингани ҳақидаги хабар билан бирга эълон қилинган фотосуратдир. «РИА Новости» суратда Соледар туз конлари акс этганини даъво қилганди. Украина қуролли кучлари эса бу Владимировка ҳудудидаги ғорлар эканини айтмоқда.
Соледар — Донецк вилоятидаги кичик шаҳар бўлиб, сўнгги вақтларда у учун шафқатсиз жанглар бормоқда. Унинг қўлдан бой берилиши Украина қўшинлари учун анча каттароқ бўлган Бахмут шаҳри мудофаасини қийинлаштириши мумкин, унга эса бир неча ойлардан буён россияликлар томонидан ҳужум олиб борилмоқда.
Изоҳ (0)