Россияда ўзбекистонлик йигит плёнка майдалагичга тушиб кетиб, ҳалок бўлди

Россиянинг Волхова шаҳрида ўзбекистонлик 20 ёшли йигит плёнка майдалагичга тушиб кетиб, ҳалок бўлди. Бу ҳақда 78.ru хабар берди.

Ҳодиса 9 январь куни маҳаллий вақт билан соат 10:00 да юз берган. Йигит қайта ишлаш ускуналарини тозалашни бошлаган ва қандайдир тарзда плёнка майдалагичга тушиб кетган. У олган тан жароҳатлари туфайли воқеа жойида вафот этган. Ҳодиса оқибатида Волхова тергов бошқармаси бошлиғи бошчилигидаги гуруҳ заводга жўнаб кетган.

Ҳолат юзасидан Россия Жиноят кодексининг 216-моддаси (эҳтиётсизлик сабабли инсон ўлимига олиб келган ишларни бажаришда хавфсизлик қоидаларини бузиш) бўйича жиноий иш қўзғатган. Ҳуқуқ-тартибот идоралари ходимлари Ўзбекистондан Санкт-Петербургга келган йигитнинг яқинларини қидирмоқда.

Аввалроқ Қозоғистондаги олтин конида Ўзбекистон фуқароси ҳалок бўлганди. Марҳум 18 кун давомида шахтада қолиб кетгани аниқланган. Шунингдек, Россияда ўзбекистонлик қурувчи баландликдан қулаб ҳалок бўлган. Йигит олган тан жароҳатлари туфайли вафот этган. Яна бир ўзбекистонлик ишчи Санкт-Петербургда 7-қаватдан тушиб кетиши оқибатида ўлган. У 45 ёшда бўлган ва олган тан жароҳатлари туфайли воқеа жойида ҳалок бўлган.