«Дарё» нашри 10 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Музлатилган Россия активларини Украинага ўтказиш жараёни бошланмоқда
Эстония мамлакатда музлатилган Россия активларини Украинага ўтказиш имконини берувчи қонунчилик базасини 2023 йилнинг январь ойи охиригача яратишни режалаштирмоқда. Бу ҳақда Эстония Ташқи ишлар вазирлиги расмий вакили Михел Таммга таяниб, Bloomberg хабар берди.
Шундай қилиб, Эстония Европа Иттифоқида Россия активларини Киевга ўтказадиган биринчи давлатга айланиши мумкин, чунки бошқа давлатлар бундай механизм яқин орада яратилишини эълон қилганича йўқ, деб таъкидлайди Bloomberg.
Ҳозирда Эстония томонидан музлатилган Россия маблағларининг умумий миқдори 20 миллион долларни ташкил қилади. Умуман олганда, Европа Иттифоқи Россиянинг 68 миллиард евролик активларини музлатиб қўйган.
Хитой ва Тайван низоси АҚШ ва Япония ҳамкорлигини кенгайтира бошлади
Айни пайтда АҚШ ва Япония қуролли кучлари ўз қўмондонлик тузилмаларини тезкорлик билан интеграциялаштириб, қўшма операцияларини кўпайтиради, чунки Вашингтон ва унинг Осиёдаги иттифоқдошлари Хитой ва Тайваннинг эҳтимолий низосига тайёрланмоқда. Бу ҳақда Financial Times хабар берди.
Бундан ташқари, сўнгги музокаралардан сўнг Япония ва АҚШ янги авлод ядро реакторларини ишлаб чиқишда ҳамкорликни йўлга қўяди деб ёзмоқда Kyodo агентлиги.
«Ҳамма нарса вайрон бўлган, ҳаёт деярли йўқ» — Зеленский Соледар учун кечаётган шиддатли жанглар ҳақида гапирди
Украина президенти Владимир Зеленский видеомурожаатида Донецк ва Луганск вилоятларидаги вазиятни «энг қайноқ» нуқталар деб атаб, Донбасс учун кураш давом этаётганини таъкидлади.
9 январь куни Украина мудофаа вазири ўринбосари Анна Маляр «Вагнер» ёлланма жангчиларининг «энг яхши захиралари»дан тузилган гуруҳлар Украина Қуролли кучларининг Соледардаги позицияларига «кучли ҳужум» бошлаганини айтганди. 6 ва 7 январь кунлари «Вагнер» жангчилари Соледар атрофида Украина армиясининг мудофаасини ёриб ўтди, аммо шундан кейин Украина кучлари фронт чизиғини барқарорлаштиришга муваффақ бўлган.
Bloomberg хабар беришича айни вазиятда Япония Украинанинг урушдан энг кўп жабр кўрган ҳудудларига 1 миллион долларлик тиббий дорилар хайрия қилди.
Бундан ташқари АҚШ ҳукумати ҳозирда Украинага Stryker зирхли машиналарини етказиб бериш масаласини муҳокама қилмоқда деб ёзади Politico нашри.
Ўзбекистонда 11 январдан ўқув жараёнлари бошланади. Аномал совуқ бўлиши кутилаётган вазиятда ушбу жараён қандай ташкиллаштирилади?
Олий ҳамда профессионал таълим муассасалари ва академик лицейларда 11 январдан бошлаб босқичма-босқич дарс машғулотлари бошланади, деб хабар бермоқда Олий таълим, фан ва инновациялар вазирлиги матбуот хизмати.
Қайд этилишича, ўқув жараёнларини маҳаллий ҳокимликлар билан келишилган ҳолда ташкил этиш тавсия этилди. Ушбу жараёнларни белгиланган тартибда амалга ошириш мақсадида ҳар бир таълим муассасасида кеча-ю кундуз фаолият олиб борувчи мутахассислардан иборат «Штаб» ташкил этилади.
Аномал совуқ бўлиши кутилаётган 10—18 январь кунларида барча таълим муассасаларида ҳар қандай мажлислар, тадбирлар ва бошқа йиғилишлар ўтказиш та’қиқланади.
Ўқув жараёнларини ташкил этишда ҳудуд имкониятларини инобатга олиш ва бунга зарур шарт-шароитларни яратиш бўйича кўрсатма берилди. Зарурат туғилганда ўқув графигига ўзгартириш киритилади ва об-ҳаво шароитлари туфайли ўқишга келолмаган талабалар назорат имтиҳонларига тайёргарлик кўриши бўйича тегишли масофавий дастурлар таклиф қилинади. Алоҳида таъкидлаймизки, 20 январга қадар якуний назорат ишлари ташкил этилмайди», — дейилади хабарда.
Изоҳ (0)