Эрон собиқ президенти Али Акбар Ҳошимий Рафсанжанийнинг қизи Фаизи Рафсанжаний мамлакатдаги норозилик намойишларини қўллаб-қувватлагани учун беш йилга озодликдан маҳрум этилди. Бу ҳақда Аrab News хабар берди.
Аёлнинг адвокати Неда Шамс мазкур маълумотни тасдиқлаган. «Фаизи Ҳошимий хоним ўзининг сўнгги иши бўйича қўйилган айбловлар бўйича вақтинчалик 5 йиллик қамоқ жазосига ҳукм қилинди», — дейди у.
Расмийлар Фаизини миллий хавфсизликка қарши ташвиқот ва ҳаракатларда айбламоқда. 60 ёшли Ҳошимий сентябрь ойида Теҳронда умуммиллий намойишларда иштирок этишга чақиргани учун ҳибсга олинганди. Унинг адвокати Неда Шамс суд қарори устидан шикоят қилишни режалаштираётганини қўшимча қилган.
2012 йилда аёл «Ислом республикасига қарши тарғибот»да айбланиб, олти ойлик қамоқ жазосига ҳукм қилинганди. 2017 йилда унга Эрон давлат арбобларининг маълумотларни чоп этгани учун яна олти ойлик қамоқ жазоси берилган.
Эронда норозилик намойишлари сентябрь ойида нотўғри ҳижоб ўраганликда айбланиб, полиция томонидан ҳибсга олинган 22 ёшли Маҳса Аминийнинг ўлими ортидан бошланганди. Эрон хавфсизлик кучлари қизнинг юрак хуружидан ҳушидан кетганини даъво қилмоқда. Унинг оиласи у калтакланганидан кейин вафот этган деб ҳисоблайди.
Мавзуга доир: Эрон олий етакчисининг жияни намойишларни қўллаб-қувватлагач, ҳибсга олинди — ОАВ
Изоҳ (0)