Ижтимоий тармоқларсиз бир кун, чалғимасдан овқатланиш. Бир йилда ҳаётингизни ўзгартирадиган 9 та тавсия

Кўпинча биз ўз мақсадларимизга эриша олмаймиз. Чунки биз ҳаётдаги бирор нарсани тубдан ўзгартиришга ҳаракат қиламиз. Аслида, кичик қадамларда ҳаракат қилиш ва кундалик одатларни аста-секинлик билан янгилаш яхшироқдир.

 

Аввалига кичик ва аҳамиятсиз бўлиб туюлган ўзгаришлар, агар сиз йиллар давомида уларга риоя қилишга тайёр бўлсангиз, ажойиб натижаларга олиб келади.

 Жеймс Клеар,

«Атом одатлар» китоби муаллифи

Ҳарқалай, сиз бунга ўхшаш фикрларни олдин эшитгансиз. Лекин эшитиш ва бажариш бир хил нарса эмас. Агар ҳаётингизни ўзгартирмоқчи бўлсангиз, одатларингизни ўзгартиринг. Буни кичик ўзгаришлар билан бошланг.

1. Дарҳол жавоб беришга шошилманг

Ҳа, дунё тезлашмоқда, аммо бу сиз доимо савол ва таклифларга зудлик билан жавоб беришингиз керак дегани эмас. Ҳамма нарсага автоматик равишда рози бўлманг. Сўз бойлигингизга «Мен сизга хабар бераман» ва «Кейинроқ жавоб бераман» ибораларини қўшинг.

Кеч бўлганда сизга керак эмаслигини тушунгандан кўра, бироз ўйлаб кўрган маъқул. Бу  билан вақтингизни тежайсиз, ўзингизни кераксиз умидсизликлардан қутқарасиз.

2. Ҳеч бўлмаганда битта ишни якунига етказинг, гарчи бу ўзингизга ёқмаса ҳам

Ҳар куни бажаришни истамайдиган битта кичик вазифани танланг ва уни бажаришга ўзингизни мажбурланг. Бу турлича бўлиши мумкин: таомга буюртма бериш ўрнига идишларни ювинг, югуринг ёки уйда кечки овқат тайёрланг.

Бир неча кундан сўнг муаммо аниқ бир ҳолатда эмаслигини сезасиз. Эҳтимол, сиз ноқулайлик туғдирадиган нарсаларни кечиктиришга одатлангансиз.

Ва сиз биринчи қадамни қўйишнинг ўзи кифоя эканлигини, бундан кейин ҳамма нарсани охиригача етказиш қийин эмаслигига гувоҳ бўласиз. Майда вазифаларни ўзлаштирганингиздан сўнг, каттароқ ишларга ўтинг.

3. Ҳафтада бир кунни ижтимоий тармоқларсиз ўтказинг

Биз телефонга шунчалик кўникиб қолганмизки, у аллақачон қўлнинг табиий кенгайтмаси каби кўринади. Ва биз кўпинча зериккан, қайғули ёки ўзимизни ноқулай ҳис қилганда тўғри ижтимоий тармоқларга йўл оламиз. Оқибатда кўп вақтимизни беҳуда сарфлаймиз.

Ижтимоий тармоқлардан бутунлай воз кечишингиз шарт эмас. Асосийси, улардан меъёрида фойдаланиш. Ҳафтада бир кун, масалан, якшанба куни уларсиз юришга ҳаракат қилинг. Сайр қилинг, севимли машғулотингиз ёки бошқа қизиқарли нарсаларни бажаринг. Шунда ижтимоий тармоқларсиз ҳам нимадир қилиш мумкинлигини сезасиз. Шундай қилиб аста-секин бошқа кунларда уларга кириш эҳтимоли камроқ бўлади.

4. Эртанги кунга олдиндан тайёрланинг

Олдиндан режа тузсангиз, ишни тезроқ бажаришингиз мумкин. Бунда ҳеч қандай сеҳр ё сир йўқ, фақат мантиқ иш беради.

 

Кечқурун нима кийишни ҳал қилинг ва сумкангизни йиғинг. Вазифалар рўйхатини тузинг, учрашувлар ва эслатмалар учун тақвимингизни текширинг. Кейинги кунингизни осонлаштириш учун ҳамма нарсани олдиндан тайёрланг. Уйга қайтган заҳоти ёки ухлашдан олдин буни бажаришни ўзингизга машқ қилдиринг.

5. Чалғимасдан овқатланинг

Биз овқатланаётганда ва ишлаганимизда, ўқиганимизда ёки телевизор томоша қилганимизда кўпроқ нимадир еб қўямиз. Шу билан бирга овқатнинг таъмини деярли сезмаймиз, чунки бизни бошқа масала-юмушлар чалғитади.

Бошқа ҳаракатлардан ҳоли равишда овқатланишга одатланинг. Эҳтимол, сиз шунчаки телефонингизни қўлга олмоқчи ёки бирор бир сериални ёпишга эҳтиёж сезасиз. Таслим бўлманг.

6. Иш вазифаларини бажаришда таймердан фойдаланинг

«Pomodoro» усулини ҳақли равишда «маҳсулдорлик Инжили» деб аташ мумкин. «Pomodoro» таймери диққатни жамлашга ёрдам беради, қисқа танаффуслар эса дам олиш ва қувватланиш имконини беради. Стандарт интерваллардан бошланг: 25 дақиқа иш ва 5 дақиқа дам олинг, сўнгра ўзингизга мос келадиган ритмни топинг.

7. Кечаси телефонингизни бошқа хонада қолдиринг

Агар у каравотнинг шундоқ ёнида бўлса, «будилник»ни ўчириб, яна ухлаш васвасаси юқорироқ бўлади. Ўзингизни бундан асранг.

Агар телефон узоқда бўлса, уни ўчириш учун ўрнингиздан туришингиз керак бўлади. Ва шу оралиқда сиз бугун қанча иш қилиш кераклигини эслайсиз, очлик ёки чанқоқлик ҳис қиласиз. Ҳар ҳолда, кунни бошлаш осонроқ бўлади.

8. Бирор нарсани ёқтирганингиз заҳоти сотиб олманг

Икки қоидага амал қилинг. Биринчидан, агар сизга буюм ёқса, харид қилишни бир неча кунга кечиктиринг. Агар бу вақт ичида сизга ҳақиқатан ҳам керак бўлиб туюлса, дўконга қайтинг. Табиийки, биз узоқ вақтдан бери қидираётган нарсангиз ҳақида гапирмаяпмиз.

Иккинчидан, қиймати туширилган «распродажа»дан ҳам маҳсулот сотиб олишга шошилманг. Маркетологлар бизнинг миямиз қандай ишлашини ва ажойиб шартларда сотиб олиш биз учун қанчалик ёқимли эканлигини яхши билишади. Ҳаддан ташқари харид қилмаслик учун ўзингиздан сўранг: «Мен шунинг учун тўлиқ нархни тўлайманми?» Агар жавоб йўқ бўлса, йўлингизда давом этинг.

9. Барча фикрларингизни ёзинг

Улар энг кутилмаган жойда хаёлга келади ва биз уларни эслаб қоладиганга ўхшаймиз. Аммо, одатда, улар тез орада онгимиздан чиқиб кетади. Шунда нима қилишни хоҳлаётганимизни ёки ишда қандай янги ёндашувни синаб кўришни ўйлаётганимизни эслашга қийналамиз. Бунга йўл қўймаслик учун ўзингизни барча фикрларни, ҳатто аҳамиятсиз бўлиб кўринадиган ғояларни ҳам ёзишга ўргатинг.

Мавзуга доир:

• Эртага ўзингизни яхшироқ ҳис қилиш учун бугундан амал қилишни бошлаш кэрак бўлган тавсиялар
• Нимага ҳар куни бир хил вақтда ухлашга одатланиш керак?