Хабарингиз бор, Ўзбекистондаги умумтаълим мактабларида 11 январь куни тугаши керак бўлган қишки таътил совуқ об-ҳаво оқими кириб келаётганлиги сабабли 17 январга қадар узайтирилганди. Бугун эса айтилган гапдан қайтилгани, аксарият ҳудудларда жумладан Сурхондарё, Хоразм, Андижон ва Қашқадарё вилоятларида мактаблар фаолияти 11 январдан яна давом эттириладиган бўлгани очиқланди.
Дастлаб бу ҳақдаги шов-шувлар Жиззах шаҳар халқ таълими бўлими мудири Ойдин Ҳамроқулованинг шаҳардаги умумтаълим мактаби директорларига таълим даргоҳларидаги иситиш печларини ёқиб, тайёр қилишлари кераклигини уқтириб, ўқув жараёнлари 11 январдан давом этишини билдириши билан бошланди.
Жиззах шаҳар халқ таълими бўлими мудири Ойдин Ҳамроқулованинг мактаб директорларига ёзган хабарида шундай дейилади. «Бугун ҳамма иссиқлик тармоғи сувини тўлдириб, ёқинглар. Қишки таътил бекор қилинди. Ҳаммага 11 январдан иш бошланади. Ўқитувчилар ўқувчиларни чақириб, дарсга тайёргарлик кўриб келишсин».
«Дарё»нинг бу ҳақдаги сўровига жавоб берган Ойдин Ҳамроқулова хабар мактаб директорларига 9 январь куни кечки пайт ёзилганини, 10 январь куни об-ҳаво кескин совигани ва қалин қор ёққани сабабли бу топшириқ бекор бўлганини айтди. Сурхондарё вилояти ҳокимлиги эса Telegram мессенжерида вилоят халқ таълими бошқармаси бошлиғи номидан тарқалаётган хабарлар тўғри эканини, ҳудуддаги мактабларда дарс жараёнлари 2023 йилнинг 11 январидан бошланишини тасдиқлади.
Кўп ўтмай Хоразм, Бухоро ва Андижон вилоятидаги мактабларда ҳам дарс жараёнлари 11 январдан бошланиши маълум бўлди.
Хўш, буни жамоатчилик қандай кутиб олди?
«Ҳокимлар ўқув жараёнларини белгилаш ёки таътилни бекор қилиш бўйича мустақил ваколатга эга эмас», — дейди Telegram’даги «Юристкадастр» канали админи амалиётчи юрист Саидали Мухторалиев.
Баъзи бир вилоятларда, жумладан, Андижон ва Хоразм вилоятларида айрим таълим муассасалари учун эртадан ўқув жараёнлари бошланиши ҳақида хабар тарқалди. Бу ёқда мактаблар, мактабгача таълим ташкилотлари ва олий ўқув юртлари учун 18 январгача таътил эълон қилинган. Лекин Вазирлар Маҳкамасидан чиққан қайсидир йиғилиш баёни билан ОТМ, техникум, коллеж, касб-ҳунар мактаблари ва академик лицейларда ўқув жараёнини маҳаллий ҳокимликлар билан келишилган ҳолда ташкил этиш белгиланибди. Аслида ҳокимлар ўқув жараёнларини белгилаш ёки таътилни бекор қилиш бўйича мустақил ваколатга эга эмас. Сабаби «Таълим тўғрисида»ги қонуннинг 27-моддасида маҳаллий давлат ҳокимияти органларининг таълим соҳасидаги ваколатлари келтирилган бўлиб, булар қаторида таълим муассасалари учун ўқув таътилларни белгилаш ёки уларни бекор қилиб, ўқув жараёнларини бошлаш ёки таълим ташкилотлари фаолиятини бошқариш ва мувофиқлаштириш ваколати кўрсатилмаган. Шундай экан, ҳокимликлар бу масалани мустақил ҳал қила олмайди.
Юқоридаги қонуннинг 26-моддасида Мактабгача таълим вазирлиги, Халқ таълими вазирлиги, Олий ва ўрта махсус таълим вазирлиги таълим соҳасидаги ваколатли давлат бошқаруви органлари эканлиги белгиланган. Ҳозир бу вазирликлар Мактабгача ва мактаб вазирлиги ҳамда Олий таълим, фан ва инновациялар вазирлиги сифатида қайта ташкил этилди. 26-моддада айнан мана шу вазирликларнинг асосий ваколатларидан бири сифатида таълим ташкилотлари фаолиятини мувофиқлаштириш ваколати эътироф этилган. Демоқчи бўлганимиз, таълим соҳасидаги асосий қонунда жойлардаги таълим муассасалари учун ўқув жараёнларини белгилаш ёки таътил белгилаш кўпроқ шу соҳанинг эгалари бўлган Мактабгача ва мактаб вазирлиги ҳамда Олий таълим, фан ва инновациялар вазирлигининг ваколатига киради. Хулоса сифатида айтиш мумкинки, вилоят ҳокимлари ўз ҳудудларида жойлашган таълим муассасалари учун белгиланган таътил муддатларини ўзгартиришни ҳамда қайси таълим муассасалар учун ўқув жараёнларини қайси вақтдан бошланишини юқоридаги вазирликларсиз ўзлари мустақил ҳал қила олмайди», — дейди юрист.Ҳуқуқшунос блогер Хушнудбек Худойбердиев бу ҳақда фикр билдирар экан, таълим ҳам ўйинчоқ бўлиб қолганини, бошидан пухта ўйлаб, ўрганиб, кейин қарор қилиниши кераклигини ёзмоқда.
Ҳуқуқий томондан қарасак, таътил муддатини узайтириш ҳақидаги қарорни бош вазир қабул қилган эди. Айрим ҳудудларда (шунингдек, Андижонда ҳам дейишмоқда) таътилни муддатидан аввал тугатишга бош вазир яна рухсат берибдими? Ёки ҳокимлар ҳукумат қарорига қарама-қарши таътилни тугатиш тўғрисида ўзлари қарор чиқаряптими? Қачондан буён ўзи ҳокимлар таътил муддатини узайтириш ёки қисқартиришга аралашадиган бўлиб қолди? «Таълим тўғрисида»ги қонуннинг 27-моддасида ҳокимларга бунақа ваколат берилмаган. Хуллас, ҳамма ёқ «каша». Ўртада таълим — талабалар ва ўқувчилар сарсон. Бу масалада якуний гапни Мактабгача ва мактаб вазирлиги ҳамда Олий таълим, фан ва инновациялар вазирлиги айтиши керак. Асосий ваколат уларда», — дейди блогер.
Шунингдек, бу масалага «Давлетовуз» канали ҳам эътибор қаратган.
Андижон вилояти ҳокимлиги барча таълим муассасаларида, Хоразм вилояти эса мактабларда эртадан ўқиш бошланишини эълон қилди. Таълим тизимига масъул вазирлик эса ҳозирча сукут сақламоқда, одамларда саволлар кўпайди. Марказлаштирилган тартибда расмий ахборот берилса яхши бўлар эди, — дейилади «Давлетовуз» каналида.
Ҳокимлар ташаббуси билан бошланаётган дарслар ҳақидаги янгиликни ижтимоий тармоқ фойдаланувчилари орасида кулгига олиб, заҳарханда қилаётганлар ҳам йўқ эмас.
Ўқитувчи ва мураббийлар фаолияти ҳақида ёзувчи «Маърифат» газетаси бош муҳаррири Ҳусан Карвонли шахсий Telegram каналида «Ўқитувчилар шу совуқда ҳокимларнинг ўзи мактабда дарс ўтиб берсин деяпти», деган бўлса, Facebook фойдаланувчи Меҳрибон Полвонова эса «Ўқувчиларимни мактабга чақирсам, ота-оналар менга тутуруғингиз борми деяпти», — деди.
Telegram мессенжеридаги каналларда, шунингдек, Мактабгача таълим ва мактаб таълими вазирлиги вазири Ҳилола Умарова 2023 йилнинг 6 январь куни имзолаган буйруқ скрини ҳам тарқалаётган бўлиб, унда мактаб ва боғчаларда таълим бериш жараёни 2023 йилнинг 18 январидан эканлиги ёзилган.
Бироқ бу эски буйруқ бўлиб, бугун тарқалган хабарларга Мактабгача ва мактаб таълими вазирлиги бугун соат 20:15 да муносабат билдириб, қишки таътил даврини узайтириш ваколати ҳудуддаги об-ҳаво шароитларини инобатга олган ҳолда маҳаллий ҳокимликларга берилганини маълум қилди.
"Ўзбекистон Республикаси Вазирлар Маҳкамасининг тегишли баёнига асосан ҳудуддаги об-ҳаво шароитларини инобатга олган ҳолда Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига мактабгача, умумтаълим, ўрта махсус, профессионал ҳамда олий таълим ташкилотларида қишки таътил даврини узайтириш ёки узайтирмаслик ваколати берилганлигини маълум қиламиз. Эслатиб ўтамиз, Ўзбекистон Республикаси “Таълим тўғрисида”ги Қонунининг 27 моддасида маҳаллий давлат ҳокимияти органларига таълим соҳасидаги тегишли ваколатлар берилган, — дейилади вазирликнинг узоқ кутилган изоҳида.
«Дарё» воқеалар ривожини кузатишда давом этади.
Изоҳ (0)