Ўзбекистонда 2016 йилда гемодиализ хизматини кўрсатувчи бўлимлар сони 29 та бўлган бўлса, ҳозирга келиб 65 тага етказилган. Вилоят марказларидан ташқари мамлакатнинг фақатгина 2 та туманида бўлган ушбу хизмат 2022 йилга келиб, 23 та туманда йўлга қўйилди. Гемодиализ ускуналари миқдори эса 240 тадан 690 тага ортди.
«Дарё» мухбири Республика ихтисослаштирилган нефрология ва буйрак трансплантацияси илмий-амалий тиббиёт марказида бўлиб, беморларга кўрсатилаётган гемодиализ хизмати ҳақида материал тайёрлади.
Соғлиқни сақлаш вазирлиги гемодиализ хизмати бош мутахассиси Собит Азизовнинг айтишича, президент Шавкат Мирзиёевнинг 2018 йилдаги ва 2021 йилдаги иккита тегишли қарори билан аҳолига гемодиализ ёрдамини кўрсатиш самарадорлиги кескин ошган.
«Авваллари Республика бўйича 242 та сунъий буйрак аппарати, 30 та сув тозалаш мосламаси, 10 концентраторларни тайёрлаш учун миксерлар мавжуд бўлган. Президентимизнинг ушбу соҳага қаратган эътиборларидан кейин бу кўрсатгичлар каррасига ортди. Масалан, сунъий буйрак аппарати 690 тага, сунъий буйрак бўлимлари эса 65 тага етди», — деди мутахассис.
Унинг алоҳида таъкидлашича, сунъий буйрак аппаратига тушувчи беморлар учун ишлатиладиган фильтрлар бир неча маротаба қайта ишлатилган бўлса, Президент қарори билан фильтрларни бир марталикка ўтказилиши гемодиализ хизмати соҳасидаги катта бурилишлари бўлган.
«Илгари гемодиализ сеансига тушувчилар рўйхати тузилар эди ва бунга мажюур бўлганмиз. Боиси барча беморларни қамраб олишга имкониятимиз етмасди, ўринлар йўқ эди. Ҳозирга келиб эса буйраги ишламайдиган беморлар ҳеч қандай монелик йўқ. Шунингдек, гемодиализ сеанси учун фойдаланиладиган 14 турдаги воситалар давлат томонидан беғараз таъминлаб берилмоқда. Яна бир жиҳати бу турдаги беморлар учун 5 турдаги дори воситалари беморларнинг яшаш манзили бўйича бепул берилмоқда. Бу ҳам беморларинг яшаш муддатини узайтиради, иш фаолиятини яхшилайди, улар ўзларини жамиятга керакли, деб ҳис қилади», — деди Собит Азизов.
Қорақалпоғистон, Хоразм вилояти ва Тошкент шаҳрида 1 100 нафар беморга гемодиализ хизматини кўрсатиш бўйича Ҳиндистоннинг Nephrocare Health Services Central Asia компанияси билан давлат-хусусий шериклик асосидаги битим имзоланган эди. Унга кўра, 2022 йил апрель ойида Нукус шаҳрида 150 нафар беморга хизмат кўрсатувчи янги гемодиализ клиникаси фаолияти йўлга қўйилган.
Нукус шаҳридаги Nephroplyus гемодиализ маркази шифокори Махсетбай Матчановнинг «Дарё»га маълум қилишича, марказ Президент фармонига асосан Ўзбекистон ва Ҳиндистон ўртасида давлат хусусий шерикчилиги асосида фаолиятини бошлаган.
«Бу каби гемодиализ марказлари дастлаб Тошкент шаҳри, Қорақалпоғистон Республикаси ва Хоразм вилоятларида иш бошлаган. Шулар орасида биринчилардан бўлиб Nephroplyus гемодиализ маркази 2022 йилнинг апрель ойида Нукус шаҳрида очилди.
Олдинлари давлат шифохоналарида гемодиализ марказлари бор эди. Бироқ бу марказлар йилдан йилга беморларнинг сони кўпайгани ҳисобига ва гемодиализ ускуналарининг камлиги боис талаб юқорилигича қолмоқда эди. Ҳар бир бемор буйрак етишмовчилигининг терминал босқичида гемодиализ сеансини ҳафтасига 8-12 соат олиши керак бўлади. Олдинлари бу даражада муолажа олишнинг имкони йўқ эди. Сабаби беморлар сони кўпайган, ускуналар эса кам эди.
Бу ерда 34 та гемодиализ ускунаси тўлиқ ишлаб турибди. Тўлиқ равишда 150 нафаргача беморларни қабул қила оламиз. Ҳозирда 90 нафар беморимиз тўлиқ диализ муолажаларини олмоқда.
Биз марказимизга келган беморларга бемор деб эмас, меҳмон деб мурожаат қиламиз. Бу уларга психологик жиҳатдан бироз бўлса ҳам куч беради. Меҳмонларимиз ўзларини бу ерда ўз уйларидагидек ҳис қилишига ҳаракат қиламиз. Улар фақат ўз вақтида диализ муолажаларини олса бас», — деди Махсетбай Матчанов.
Изоҳ (0)