Қашқадарёда икки ёшли қиз нотўғри эмланиш оқибатида фалаж бўлиб қолгани ҳақидаги хабарга муносабат билдирилди

Ижтимоий тармоқларда Қашқадарё вилояти Кўкдала туманида икки ёшли қизалоқ нотўғри эмлангани сабабли фалаж бўлиб қолгани тўғрисида хабар тарқалди. Вилоят Соғлиқни сақлаш бошқармаси ҳолатга муносабат билдирди.

Қайд этилишича, вазият юзасидан ходимлар томонидан хизмат текшируви ўтказилган. Аниқланишича, Кўкдала тумани «Наймансарой» маҳалласида яшовчи Ф.С. (2020 йилда туғилган) мазкур маҳалладаги Галабек оилавий шифокор пунктида рўйхатда туради. Республика болалар миллий тиббиёт марказида унга «ўткир бўшашган шол, Гиен-Барре синдроми» ташхиси қўйилган. Мазкур касалликлар келиб чиқиш сабабини аниқлаш учун эпидемиологик суриштирув ўтказилиб, беморнинг тиббий эмлаш ва ривожланиш карталари ўрганилган.

Галабек оилавий шифокор пунктида 6 ойликдан 5 ёшгача бўлган болалар учун 730 доза қизамиқ ва қизилчага қарши вакцина олинган. 700 нафар болада мазкур турдаги эмлашлар ўтказилган. Эмланган болалар бўйича суриштирув олиб борилганида уларнинг ҳеч бирида эмлашдан кейинги ножўя таъсирлар кузатилмагани маълум бўлган. Шулар қаторида бемор Ф.С. 2022 йил 23 ноябрь куни шифокор кўригидан кейин шамоллаш белгилари бўлмагани сабабли эмлашга рухсат берилган. Боланинг отасининг сўзларига кўра, эмлашдан сўнг кечаси беморнинг ҳарорати кўтарилган. Аввалига хусусий шифохона, сўнг Чироқчи тумани тиббиёт бирлашмаси мутахассиси томонидан берилган тавсиялар асосида уй шароитида даво муолажалари қилинган.

Аҳволи яхшиланмагач, Самарқанддаги шифохонада даволаниш давом эттирилган. Ижобий ўзгариш кузатилмагани сабабли республика болалар миллий тиббиёт марказида текширувдан ўтказилиб, юқорида қайд этилган ташхис асосида муолажалар қилинган. Яхши томонга ўзгариш бўлганидан кейин уйига жавоб берилган.

Республика санитария-эпидемиологик осойишталик ва жамоат саломатлиги хизмати вирусология хизмати лабораторияси томонидан 2022 йил 21 декабрда олиб келинган бемор Ф.С.га тегишли материал ўткир бўшашган шол касаллигига текширилганида манфий натижа қайд этилган. Яъни болада бу касалликни келтириб чиқарувчи полиомиелит ва энтеровируслар аниқланмаган.

Ўрганиш хулосаларига кўра, беморда кузатилган касаллик эмлаш асорати эмаслиги аниқланган. Ташхис: «ўтказилган нейроинфекция асорати пастки парапарез».

«Айни пайтда бола вилоят соғлиқни сақлаш бошқармаси назоратига олиниб, уй шароитида парваришланмоқда, унда ижобий томонга ўзгариш кузатилмоқда», — дейилади хабарда.