ЕХҲТ бош котиби Россиянинг ташкилотдан четлаштирилишига қарши чиқди

Европа хавфсизлик ва ҳамкорлик ташкилоти (ЕХҲТ) бош котиби Хелга Шмид Россиянинг ташкилотдан чиқарилишини қўллаб-қувватламади. Украина Россия делегациясини ЕХҲТдан четлаштиришни талаб қилмоқда.

«Бугунги нуқтаи назардан, Россиянинг ЕХҲТ аъзоси бўлишда давом этиши мантиқий, деб ўйлайман», — деди Шмид хоним Welt газетасига берган интервьюсида.

Унинг фикрича, бир стол атрофида ўтириш «дипломатик илтифот алмашиш»ни англатмайди. «Кун келиб бизга яна алоқа каналлари керак бўлади», — деб тушунтирди ЕХҲТ бош котиби.

Ноябрь ойида ЕХҲТ Парламент Ассамблеясининг (ПА) сессияси бўлиб ўтганди, унда Россия Федерациясидан делегатлар иштирок этмади: ташкилотчилар уларга виза бермади. Россиялик парламентарийларнинг таъкидлашича, ЕХҲТ «мунозаралар пайтида ноқулай нутқлардан қўрққан». Украина делегацияси Россия ташкилотдан чиқарилмагунча ЕХҲТ ПАни бойкот қилишга ваъда берган.