Ўзбекистон 2022 йилнинг январь—ноябрь ойларида 16 та давлатга қиймати 33,2 млн долларга тенг бўлган 135,8 минг тонна қовун ва тарвуз экспорт қилган. Бу ҳақда Давлат статистика қўмитаси хабар бермоқда.
Қовун ва тарвуз экспорти ҳажми 2021 йилнинг мос даврига нисбатан солиштирилганда 53,8 минг тоннага кўпайган.
Ўзбекистон 2022 йилнинг 11 ойида энг кўп қовун ва тарвуз экспорт қилган давлатлар орасида Қозоғистон етакчилик қилмоқда — 58,2 минг тонна. Бу 2021 йилнинг мос даврига нисбатан 25 минг тоннага кўпдир.
Ўзбекистондан қовун сотиб олиш бўйича Россия (28,1 минг тонна) иккинчи ўринда бораётган бўлса, Қирғизистон (27,2 минг тонна) учинчи бўлмоқда. Мазкур учлик 2021 йилнинг ўн бир ойига нисбатан ўзгармаган.
Россия ва Украина ўртасидаги уруш оқибатида Ўзбекистоннинг Украинага қовун ва тарвуз экспорти деярли тўхтаб қолган. 2021 йилда мамлакат Украинага 5,6 минг тонна қовун-тарвуз етказиб берган эди.
2022 йилнинг январь—ноябрь ойларига кўра ўзбек қовун-тарвузлари Тожикистон (14,5 минг тонна), Латвия (2,8 минг тонна), Беларусь (2,4 минг тонна), Германия (868 тонна) ва Польшага (684 тонна) экспорт қилинган.
Аввалроқ 2022 йилда Ўзбекистон тарвуз экспорти бўйича рекордни янгилагани ҳақида хабар берилган эди.
Изоҳ (0)