Tailand qiroli Maha Vajiralongkornning 44 yoshli qizi malika Bajrakitiyabha yuragi bilan bog‘liq muammolar tufayli hushidan ketganidan keyin uch haftadan ko‘proq vaqt davomida komada qolmoqda. Bu haqda qirollik sudi matbuot xizmati bayonotiga tayanib, Reuters xabar berdi.
Tailand qirolining to‘ng‘ich qizi 15-dekabr kuni mikoplazma infeksiyasidan kelib chiqqan yallig‘lanish oqibatida yuzaga kelgan og‘ir yurak aritmiyasi tufayli hushidan ketgan.
“Shifokorlar dori-darmonlar bilan ta‘minlashda, yurak, o‘pka va buyraklar faoliyatini qo‘llab-quvvatlash uchun asbob-uskunalardan foydalanishda davom etmoqda. Ular malikaning ahvolini diqqat bilan kuzatgan holda antibiotiklardan foydalanishmoqda”, — dedi qirollik saroyi.
Malika Bajarakityabha shimoli-sharqdagi Nakxonratchasima provinsiyasida o‘z itlarini musobaqaga tayyorlayotganda kasal bo‘lgan. Dastlab u provinsiyada davolangan, keyin vertolyotda Tailand poytaxti Bangkokka olib ketilgan. Malika qirol Vajiralongkornning rasmiy unvonlari va taxtga chiqish huquqiga ega bo‘lgan uch farzandidan biri bo‘lib, Tailand toji uchun eng ko‘p da’vogar hisoblanadi. Biroq qirol hali rasman merosxo‘r tayinlagani yo‘q, shuningdek, malika taxtga o‘tirish istiqboli haqida ham rasmiy muhokamalar bo‘lmagan.
Malika Bajarakityabha huquqshunoslik bo‘yicha magistr, xalqaro munosabatlar yo‘nalishida bakalavr va huquqshunoslik doktori darajasiga ega. U Tailandning BMTdagi doimiy vakili bo‘lgan va 2006-yildan beri Tailand Bosh prokuraturasida ishlaydi, hozirda Udon Tani provinsiyasi Bosh prokuraturasida faoliyat olib boradi.
Izoh (0)