Карим Бензема Ла Лига тўпурарлари рўйхатида Ди Стефанога етиб олди

«Реал» клуби ҳужумчиси Карим Бензема Ла Лига 16-тури доирасида кечган «Вильярреал»га қарши баҳсда (1:2) гол уришга муваффақ бўлди.

Бу франциялик футболчи учун чемпионат доирасидаги 227-гол бўлди. Бу борада Бензема Примеранинг энг яхши тўпурарлари рўйхатида Альфредо ди Стефанога етиб олди.

Лига тарихидаги энг яхши тўпурар Лионель Месси ҳисобланади, «Барселона» собиқ форварди ҳисобида 472 та тўп бор. Шунингдек, Криштиану Роналду (311), Телмо Сарра (251), Уго Санчес (234) ва Рауль (228) бу борада Бенземадан олдинда.

Бензема Ла Лигада қаторасига тўртта ўйиндан бери гол урмоқда. Аввалроқ 35 ёшли футболчи «Вальядолид», «Элче» ва «Барселона» дарвозаларини ишғол қилганди.

Бензема Примера жорий мавсумида 9 та ўйинда иштирок этиб, 8 та гол уришга муваффақ бўлди.