Бухоро вилояти Ғиждивон туманидаги савдо мажмуасида 7 январь куни ёнғин содир бўлганди. Вилоят ФВБ ахборот хизмати ҳолат юзасидан қўшимча маълумот берди.
Ўрганишлар давомида 2 қаватли савдо мажмуасининг «Б» блокидаги савдо дўконларининг 960 квадрат/метр майдонда жойлашган 61 та дўкон ва ичидаги жиҳозлари ёниб зарарлангани аниқланган.
Қутқарувчилар савдо мажмуасининг «Б» блоки ертўла қисмидаги 64 та савдо дўкони ҳамда мажмуанинг 6000 квадрат/метр майдондаги блоклардаги ертўла қисми ва 1-қаватдаги жами 256 та савдо дўконлари сақлаб қолган.
Ҳодиса оқибатида тан жароҳати олган ва ҳалок бўлганлар йўқ. Содир бўлган ёнғин юзасидан вилоят ИИБ ва ФВБ томонидан терговга қадар суриштирув ишлари олиб борилмоқда.
Ёнғин сабабини аниқлаш мақсадида ёнғин-техник экспертизаси тайинланган. Воқеа жойига вилоят Ҳокими ва ўринбосари, вилоят ФВБ раҳбарияти, ИИБ, ССБ, прокуратура ва бошқа тегишли ташкилотлар масъул ходимлари чиқишган.
Изоҳ (0)