Давлат статистика қўмитаси томонидан «Статистика» интеграллашган ахборот тизими (СИАТ) яратилди ҳамда унинг негизида siat.stat.uz Ўзбекистон Республикаси статистика портали ишга туширилди. Бу ҳақда қўмита ахборот хизмати хабар қилди.
Қайд этилишича, портал расмий статистика маълумотлар ягона базасини шакллантиради. Маълум бир давр бўйича маълумотларни электрон форматларда олиш имкониятини яратади.
СИАТда расмий статистикани эълон қилиш ва уларни фойдаланувчилар томонидан қидириб топиш вақти 5-10 баробарга, алоҳида сўровлар асосидаги интеграция қилиш вақти эса 10 кундан 1 кунгача қисқартирилган.
«Бу, ўз ўрнида халқаро ташкилотлар, жумладан, Open Dаtа Watch ташкилоти экспертлари томонидан ижобий баҳоланди», — дейилади хабарда.
Ҳозирги кунда СИАТ ахборот тизимида 19 та йўналишда жами 1 700 дан ортиқ расмий статистик кўрсаткичлар, 10 йиллик динамик қаторларда, шунингдек, 30 йиллик макрокўрсаткичлар 5 йиллик кесимда фойдаланувчиларга қулай ва бепул шаклда юклаб олиш учун 3 хил (Excel, PDF ва JPG) форматда ҳамда мустақил равишда интеграция қилиш учун 3 хил (CСV, JСОN ва HМL) форматда жойлаштирилган ва доимий равишда янгилаб борилади.
Портални ишлаб чиқишда Япония, Ҳиндистон, Туркия, Озарбайжон, Россия, Беларусь, Қозоғистон ва бошқа ривожланган давлатларнинг тажрибаси ўрганилган.
Ўзбекистон Республикаси статистика порталидан ўзбек, рус ва инглиз тилларида фойдаланиш мумкин.
СИАТ ахборот тизими тегишли вазирлик ва идоралар учун зарур статистик маълумотларни интеграция йўли билан электрон ахборот алмашинишни йўлга қўйиш ҳамда қуйидаги бир қатор вазифаларни амалга ошириш мақсадида ишлаб чиқилган:
- маълумотлар базасини бошқаришнинг замонавий тизимларини жорий этиш;
- рақамли статистик маълумотлар манбаларини ягона маълумотлар омборига тўплаш;
- интеграция платформаси (RESТ-API) асосида ахборот алмашинувини йўлга қўйиш;
- маълумотларни визуал тасвирлаш (жадвал, график, диаграмма, картограмма) модулини жорий этиш;
- статистик маълумотлардан фойдаланувчилар учун ягона веб-интерфейс жорий этиш.
СДМХ стандарти асосида ҳар бир статистик кўрсаткич бўйича метамаълумотларнинг тизимга жойлаштирилганлиги фойдаланувчиларга кўрсаткич биринчи бор эълон қилинган, янгиланган сана, унинг бирламчи манбаси, ҳисоблаган орган ва услубиёти, масъул бўлинма ва ходим тўғрисида ҳамда шу каби бошқа маълумотларни олиш имконини беради.
Изоҳ (0)