Афғонистоннинг «Толибон» ҳаракати 5 январда Хитойнинг нефть компанияси билан мамлакат шимолидаги нефть захираларини қазиб олиш ва ўзлаштириш бўйича биринчи халқаро шартномани имзолади. Бу ҳақда Voanews хабар бермоқда.
«Толибон»нинг юқори мартабали мулозимлари ва Хитойнинг Кобулдаги элчиси Ван Ю Афғонистон пойтахтида телевидение орқали имзолаш маросимга гувоҳ бўлди.
Бу 2021 йил августида «Толибон» ҳаракати ҳокимиятни қўлга киритганидан бери Афғонистон эришган биринчи йирик хорижий сармоявий битим бўлди.
«Толибон» кончилик вазири Шаҳобиддин Дилавар Хинжианг Central Asia Petroleum анд Gas Co (CAPEIC) билан тузилган шартнома Аму дарёси ҳавзасида нефть қазиб олиш учун Хитойдан йилига 150 миллион доллар сармоя олиб келишини айтди.
Унинг сўзларига кўра, келишув шимолий Сарипол, Жузжон ва Фарёб вилоятларида жами 4 500 квадрат километр майдонни эгаллаб, 3 000 га яқин афғонистонлик учун иш ўринларини яратади.
Дилавар, Хитой сармояси 25 йиллик шартнома учун уч йил ичида 540 миллион долларгача ошиши кутилаётганини айтди.
Унинг қўшимча қилишича, «Толибон» ҳаракати маъмурияти лойиҳада 20 фоизлик ҳамкорликка эга бўлиб, уни 75 фоизга ошириш кўзда тутилган.
«Аму дарё нефть лойиҳаси Хитой ва Афғонистон ўртасидаги амалий ҳамкорликнинг муҳим лойиҳасидир. Ушбу лойиҳанинг бориши энергетика ва бошқа соҳалардаги йирик лойиҳаларда Хитой—Афғонистон ҳамкорлиги учун намуна яратди», — деди Хитой элчиси Ванг.
Толибон вазири келишувга кўра, хом нефть Афғонистон ичида қайта ишланишини айтиб, Хитой компанияси мамлакатда нефтни қайта ишлаш заводи қуришини таклиф қилди.
Афғонистоннинг фойдаланилмаган ресурслари 1 триллион доллардан ошиқроқ экани тахмин қилинмоқда. Хорижий инвесторлар уларни ўрганишга қизиқиш билдирди, аммо Жанубий Осиё давлатида ўнлаб йиллар давом этган можаролар бундай ташаббусларни тўхтатди.
Изоҳ (0)