Андижон вилоятидаги ҳайвонот боғида айиққа овқат бераётган боғ ишчиси айиқ ҳужуми сабаб вафот этди. «Дарё» мухбири билан суҳбатлашган масъуллар ишчи хавфсизликка риоя қилмаганини айтмоқда.
Ўзини марҳумнинг қизи деб таништирган Малика Қодированинг айтишича, дадаси ҳайвонларга эшик олдида ем бераётган бўлган. Шу пайт айиқ қафасдан қочиш мақсадида унга ҳужум қилиб, ўнг томонини йиртиб, бошини узиб ташлаган.
Отам «зоопарк»да ишларди. 3 январь куни айиқ ҳужум қилиб, ҳалок бўлди. Шерикларининг айтишича, у айиққа ем бераётган бўлган. Шунда айиқ қочмоқчи бўлиб, қафасни ёпишга уринган дадамга ҳужум қилган. Ва ўнг томонини йиртиб ташлаган, бошини узиб олган. Бошлиқларига видеосини менга ҳам қўйиб беринг десам, беришмади. Бундай деганимнинг сабаби дадамнинг ўлими «зоопарк»даги биринчи ўлим эмас, иккинчиси ҳисобланади. Бошлиғи дадамни кўмиб берди, холос. Бошқа шароит яратиб бермади. Булар дадамни кўмгани олти миллион пул бериб, шу билан йўқ бўлиб кетишяпти. Ички ишлардан ҳеч ким келмади, ҳеч нарса демади. Тўғри, ўтиб қолган куни «милиция»дан борди, номерларини олишди-ю кетишди. Шу бўйи тергов ёки ҳеч қандай иш очишмади. Ҳеч ким ҳаракат қилаётгани йўқ, — дейди марҳумнинг қизи.
«Дарё» мухбири ҳолатни ўрганиш мақсадида ҳайвонот боғида ҳам бўлиб, боғ раҳбарияти билан кўришди. Ўзини ҳайвонот боғи бошқарувчиси Азизилло деб таништирган шахс воқеа ҳақиқатан ҳам юз берганини, бироқ воқеа марҳумнинг қизи айтганидек эмас, ишчининг хавфсизлик қоидаларига амал қилмаслиги ортидан келиб чиққан.
2022 йилдан буён шу ерда бошқарувчи бўлиб ишлайман. Ҳар куни барча ходимлар техника хавфсизлигидан ўтишади. Бу алоҳида китобда рўйхатга олиниб, имзолатилади. Шундай қилмасак бўлмайди. Чунки, ўзингизга маълум бу ерда ёввойи ҳайвонлар боқилади. Шу сабабли ҳар бир ходимга алоҳида тушунтириш берилади.
Айрим ходимларимиз шу ерда навбати билан қолиб, ҳайвонларга қарайди. Ўша куни мен уйга кетгандим. Кечга яқин шунақа хабар беришди, етиб келдим. Болаларнинг айтишича, қиш бўлгани учун айиқларнинг биттаси ёпиниб олиб ухлаётган бўлган. Иккинчи айиқ уйғоқ бўлган. Ишчимиз қафас эшигини очиб, ичкарига кириб олган. Бир-икки кун аввал ҳам шундай қилганида унга бундай қилмаслиги кераклигини уқтиргандик. Аммо ўзингиз биласиз руслар ҳайвонларга меҳрибон бўлади. Шунинг учун кириб олган. Кутилмаганда айиқ унга ҳужум қилган ва оғир тан жароҳати етказган. Ёрдамларга қарамасдан ишчи вафот этган, — дейди бошқарувчи.
Бошқарувчи воқеа юз берган куннинг ўзида Ички ишлар ҳамда тез тиббий ёрдам ходимлари воқеа жойига етиб келиб, вазиятни ўрганишганини, қўшимча маълумотларни Ички ишлар ходимларидан олиш мумкинлигини билдирган.
«Дарё» мухбирлари, шунингдек, марҳум хонадонида ҳам бўлиб, унинг оила аъзолари билан суҳбатлашишга уринган. Бироқ ҳовли эшиги очиқ бўлса-да хонадон ичкарисидан ҳеч ким жавоб бермаган.
Андижон вилояти Ички ишлар бошқармаси матбуот хизматининг «Дарё»га маълум қилишича, воқеа 3 январь куни соат 16:00 ларда Хўжаобод тумани «Мустақилликнинг 27 йиллиги» МФЙ ҳудудида жойлашган Андижон ҳайвонот боғида содир бўлган.
Мазкур ҳолат Хўжаобод тумани ИИБ томонидан тегишли тартибда рўйхатдан ўтказилиб, ҳодиса жойи туман ИИБ тезкор-тергов гуруҳи томонидан кўздан кечирилган. Фуқаро А.Г.нинг олган тан жароҳатлари оғирлик даражаси ва унинг ўлими сабабини аниқлаш мақсадида суд-тиббиёт экспертизаси тайинланган.
Ҳолат юзасидан Хўжаобод тумани ИИБ ҳузуридаги Тергов гуруҳи томонидан терговга қадар текширув ҳаракатлари олиб борилмоқда.
Изоҳ (0)