Алишер Усмоновга тааллуқли компания «Капиталбанк»нинг 50 фоиз улушини сотиб олди

Finance TCI компанияси «Капиталбанк»нинг асосий акциядорига айланди. Бу ҳақда банк томонидан Ягона корпоратив ахборот порталида маълумот қолдирилган.

Finance TCI 2022 йил 28 декабрда биржа савдоларида банк устав капиталининг 50 фоизини ташкил қилувчи 214,4 млн дона оддий акциясини сотиб олган эди. Битим 786,89 млрд сўмга имзоланган ва бир дона акциянинг нархи 3 670 сўмдан ҳисобланган.

«Bankers.uz»нинг аниқлик киритишича, «Капиталбанк»нинг 50 фоиз акцияси бир марта битим тузиш орқали сотилган. Ушбу миқдордаги акциялар Россиянинг «Телекоминвест» ширкатига тегишли. Битим натижасида ширкат банк акциядорлари сафидан чиққан бўлиши мумкин.

Ҳозирда Finance TCI банкнинг 61,54 фоиз акцияларини назорат қилмоқда.

2022 йил январида ўша пайтда Алишер Усмоновнинг USM холдинги тузилмаларига тегишли бўлган компания банкнинг 8,33 фоиз улушига эга бўлди. 

USM’нинг шўъба корхонаси «Телекоминвест» 2021 йилнинг кузида банк акциядорига айланди, кейин эса ўз улушини кенгайтирди.

Январь ойи охирига келиб Усмоновга алоқадор компаниялар «Капиталбанк»нинг 58,33 фоизини назорат қилган.

Россиянинг Украинадаги уруши ортидан, Алишер Усмонов, бир қатор россиялик олигархлар каби ғарб санкциялари остида қолди. 

Бунинг оқибатида, 2022 йилнинг март ойида USM «Телекоминвест» ва Finance TCI компанияларини «Капиталбанк бизнесини ривожлантиришдан манфаатдор бўлган хусусий инвесторлар гуруҳига сотилишини эълон қилди. 

Ўзбекистондан рўйхатдан ўтказилган Finance TCI компаниясининг эгалиги USM холдингининг топ менежерлари қўлига ўтган эди.

Finance TCI раҳбари Тимур Афзалов ҳисобланади. Ҳозирда компанияга Djuzum SPV эгалик қилмоқда. Djuzum SPV айни вақтда Uzum, Uzum Market, Uzum Technologies ҳамда One Factor ва Fast Delivery Technologies компанияларининг ҳам эгаси саналади.

Аввалроқ Forbes Ўзбекистондаги 10 та энг ишончли банкни эълон қилган эди.