Калифорния шимолида Tesla Model Y автомобили 75 метр баландликдаги жардан қулаб тушди — бу 25 қаватли бинодан қулагандай гап, дейди Fox 2 San Fransisco мухбирлари.
Бахтсиз ҳодиса Сан-Франсиско яқинидаги Девилс Слайд қояли ҳудудда юз берган. Tesla электромобили бошқарувни йўқотиб, йўлдан чиқиб кетган ва жарга қулаган. Машинада икки катта ёшли киши ҳамда яна икки 4 ва 9 ёшли болалар бўлган — уларнинг барчаси омон қолган.
Tesla Model Y сувгача етиб бормаган, аммо тошларга кучли зарб билан урилиб, машина бир уюм металлга айланган. Шунга қарамай электрокар ҳайдовчи ва йўловчиларни ҳимоя қила олган.
Ҳодиса иштирокчиларини эвакуация қилиш учун вертолёт керак бўлган, қутқарувчилар эса тоққа чиқиш учун асбоб-ускуналардан фойдаланишга мажбур бўлган. Вазият мураккаб об-ҳаво шароити — ёмғир ва кучли шамол туфайли янада оғирлашган. Ҳайдовчи ва йўловчилар касалхонага ётқизилган, бироқ кўп ўтмай болаларга уйга жавоб берилган, чунки улар жуда майда жароҳатлар олган.
Қутқарувчиларнинг қайд этишича, бу ҳудуддаги биринчи бахтсиз ҳодиса эмас. Илгари ҳам Девилс Слайдда автомобиллар бир неча бор қоядан қулаган, аммо шу пайтгача одамлар омон қолишга муваффақ бўлмаган.
Tesla Model Y электромобили бозордаги энг хавфсиз автомобиллардан бири ҳисобланади. Модель барча авария синовларида юқори баҳо олган.
Айни пайтда полиция ҳайдовчини ҳибсга олмоқчи: у ўз жонига қасд қилиб, бутун оиласини ҳам ўлдирмоқчи бўлган, шунинг учун атайлаб жарликка ҳайдаган, деган гумонлар бор.
Изоҳ (0)