Ижтимоий тармоқларда Ўзбекистон журналистика ва оммавий коммуникациялар университети (ЎзЖОКУ) ректори Шерзод Қудратхўжанинг Халқаро пресс-клуб кўрсатувида мактаб дастуридаги физика ва кимё фанлари соатларини қисқартириш ҳақидаги таклифи кенг муҳокамаларга сабаб бўлди. Шерзод Қудратхўжа ҳолатга муносабат билдириб, унинг фикрлари нотўғри талқин қилинаётганини айтди.
Унинг айтишича, ўрта таълим мактаблари ўқув дастуридан кимё ва физика фанларини чиқариб ташлашни таклиф қилгани ҳақидаги хабарлар асоссиз.
«Видеолавҳада 2 соатлик кўрсатувнинг 30 сонияси кўрсатилган, холос. Мен ушбу фанлар қийин қилиб юборилганини айтиб, болаларимизга енгилроқ, креативроқ дарс ўтайлик, деб таклиф киритдим.
Физика, кимё каби фанлар, албатта, керак. Лекин бу дарсларни ўқитишда эски қолиплардан воз кечиб, замонавий методлардан фойдаланишимиз керак.
Масалан, бир эсланглар, 10—11-синфларда ўрганган қайси мураккаб формула эсингларда қолган? Дарслар қанчалик қийин бўлган, қизил диплом олишда қанчалик халақит қилган, ўқишга киришдан чалғитган? Шу маънода айтдим, холос», — дея изоҳлайди ЎзЖОКУ ректори.
Шерзод Қудратхўжанинг фикрича, бу фанларнинг академик даражада ўтилиши оқибатида таълимда жуда кўп муаммолар келиб чиққан.
«Вазият жуда оғир. Дарсликлар қайта кўриб чиқилаётган пайтда фарзандларимиз ўрганадиган дарслар оддий, ҳаётий бўлиши кераклиги муҳим деб ҳисоблайман.
Эртага физик олим бўлмоқчи бўлганлар эса кейинчалик фанни чуқурлаштирилган, факултатив дарсларда, махсус синфларда ўрганиши мумкин», — дея қўшимча қилди у.
Ҳолатга мактабгача ва мактаб таълими вазири Ҳилола Умарова ҳам муносабат билдирди. Унинг айтишича, ушбу фанларнинг мактаб ўқувчиларига ўқитилиши бекор қилиниши ҳақидаги фикрлар ҳеч бир асосга эга эмас ва бундай хавотирга ўрин йўқ.
Изоҳ (0)