Адлия вазирлигида болаларни тазйиқ ва зўравонликдан ҳимоя қилишга оид қонун лойиҳасини тайёрлаш бўйича UNICЕF’нинг Ўзбекистондаги ваколатхонаси мутахассислари иштирокида семинар-тренинг ўтказилди. Бу ҳақда «Дунё» ахборот агентлиги хабар қилди.
Қайд этилишича, бугунги кунда турли давлатларда олиб борилган 80 га яқин тадқиқотларга кўра мактаб ўқувчиларининг 35 фоизи доимий равишда тазйиқ ва зўравонликка учрайди. Тазйиқ ва зўравонликка қарши курашиш бўйича махсус дастурларга эга бўлган АҚШ, Буюк Британия, Скандинавия давлатларида бундай дастурлари бўлмаган давлатларга қараганда тазйиқ ва зўравонлик кўрсаткичи 20 фоиз камроқни ташкил қилади.
Семинар давомида Ўзбекистонда ҳам болаларга нисбатан тазйиқ ва зўравонликка қарши курашишга қаратилган ҳуқуқий механизмларни мустаҳкамлаш бўйича ишлаб чиқиладиган қонунчилик ҳужжатларининг концептуал асослари кўриб чиқилган.
Хусусан, ишлаб чиқиладиган қонун лойиҳасида болаларга нисбатан ўтказиладиган тазйиқ ва зўравонликнинг барча шаклларидан ҳимоя қилиш тизими, бу борадаги давлат сиёсати, давлар органларининг вазифалари белгиланиши таъкидланган.
Шунингдек, бугунги кунда васийлик ва ҳомийлик органлари томонидан фунсионал вазифаларини амалга оширишдаги камчиликлар қизғин муҳокама қилинган. Семинар-тренинг якунида муҳокама қилинган масалалар билан қонун лойиҳасини ишлаб чиқиш ва келгусида уни яна муҳокама қилишга келишиб олинган.
Изоҳ (0)