Шимолий Корея етакчиси Ким Чен Ин қизи билан биргаликда тактик ядровий зарядни ташийдиган КН-23 ракеталари ва «Хвасон-12» баллистик ракеталари сақланадиган омборни кўздан кечирди. Бу ҳақда Yonhap хабар берди.
КХДР телевиденияси томонидан эълон қилинган суратларда 10 га яқин «Хвасон-12» ракеталарини кўриш мумкин. Ким Чен Ин Россиянинг «Искандар» ракеталарининг аналоги деб аталадиган КН-23 ракеталарини ҳам кўздан кечирган. Шимолий Корея етакчиси ва қизининг иштирокидаги кадрлар партиянинг 26-31 декабрь кунлари бўлиб ўтган олтинчи пленумида кўрсатилган.
Ким Чен Ин қизининг тасвири «Шимолий кореяликларнинг келажак авлоди» рамзи сифатида қаралмоқда. Экспертлар фикрича, бундай қадам шимолий кореяликларни тинчлантириши ва ядро қуролининг «қонунийлигини» кўрсатиши керак.
КХДР етакчисининг қизи учинчи марта омма олдига чиқди. Корея давлат марказий ахборот агентлиги (KCNA) биринчи марта 2022 йил ноябрь ойи бошида у билан тушган суратни эълон қилди. Ким Чен Иннинг қизи янги турдаги «Хвасон-17» қитъалараро баллистик ракета учирилишида иштирок этган.
Ноябрда KCNA Шимолий Корея етакчиси ва унинг қизи ракета ҳамда ҳарбий хизматчилар олдида тушган суратини намойиш қилган.
Шимолий Корея расмийлари Ким Чен Иннинг фарзандлари борлигини тасдиқламаган. Жанубий Корея разведкаси маълумотларига кўра, КХДР етакчиси рафиқаси Ли Сол Чжу билан 2010, 2013 ва 2017 йилларда туғилган икки қизи ва бир ўғли бор.
Изоҳ (0)