Россиянинг Кубан вилоятида «Вагнер» хусусий ҳарбий компаниясининг ёлланма аскарлари қабристони топилди. Бу ҳақда Сота Telegram каналига таяниб, UNIAN хабар берди.
Маълум қилинишича, қабристон бегона кўзлардан яширинган. Урушда ҳалок бўлган аскарлар ёпиқ ҳудудга дафн этилган. Қабристонда юздан ортиқ қабр бор, уларнинг сони деярли ҳар куни ортиб бормоқда.
«Вагнерчилар»нинг барча қабрлари ўртасидаги характерли фарқ фотосуратлар йўқлигидан иборат.
Эслатиб ўтамиз, Луганск вилоятида «Вагнер» хусусий ҳарбий компанияси ўқув марказидан олти нафар маҳбус қочиб кетган бўлиб, улар орасида ўзбекистонликлар ҳам бор. Ёлланма жангчилар жанговар ҳаракатлар зонасига кетиши керак бўлган пайтда қочиб кетган. «Вагнер» гуруҳи раҳбари Пригожин улар ҳақида «барча зарур ахборот» борлигини айтган.
Украинадаги урушда қатнашаётган Вагнер жангчиларининг тахминан 90 фоизи маҳбуслар бўлиши мумкин. Украинадаги «вагнерчилар»нинг умумий сони 50 минг кишига етиши, улардан 40 мингга яқини маҳбуслар бўлиши айтиилган. Сўнгги ҳафталарда Украинада мингга яқин «Вагнер» жангчилари ўлдирилган, уларнинг 90 фоизи собиқ маҳбуслар бўлган.
Россия қамоқхоналаридаги маҳбусларни Украинадаги урушда қатнашиш учун ёллаш 2022 йилнинг ёзида маълум бўлди. Вагнер гуруҳи асосчиси Евгений Пригожин шахсан ўзи баъзи колонияларга маҳбусларни ёллаш мақсадида борган. Бу ҳақда 21 декабрь куни Владимирдаги қаттиқ тартибли колонияда жазо ўтаётган сиёсатчи Алексей Навальний ҳам айтган.
Аввалроқ Россиянинг Свердловск вилоятида депутат Вячеслав Вегнер аёл маҳбусларни Украинадаги урушга юборишни таклиф қилганди. «Вагнер» хусусий ҳарбий компанияси раҳбари Евгений Пригожин депутатнинг таклифини қўллаб-қувватлаган.
Изоҳ (0)