Киев мэри Виталий Кличко уруш бошланганидан бери Россия ҳарбийлари Украина шаҳарларининг 30 нафар мэрини ўғирлаб кетганини айтди. Бу ҳақда у Spiegel нашрига маълум қилди.
Кличконинг сўзларига кўра, еттита шаҳарнинг раҳбари ҳали ҳам бедарак йўқолган. «Мэрлар ҳамма жойда нишонга айланган эди. Руслар мэрларни ҳибсга олишга уриниб, уларни ҳамкорликка мажбурлаш учун турли усуллардан фойдаланди», — дейди Киев мэри.
Украина ҳукумати мэрларга уларнинг бошқарувидаги ҳудуд Россия ҳарбийлари томонидан эгаллаб олинган тақдирда шаҳарни тарк этиши керакми ёки йўқми, аниқ жавоб бермаган. Кличко украиналикларнинг ўзлари шундай қарор қабул қилишга мажбур бўлганини айтмоқда.
«Вазият оғир эди: агар шаҳарда қолсангиз, сиз хоинсиз. Ҳукуматдан бу бўйича кўрсатма беришни бир неча бор сўраганмиз. Лекин аниқ жавоб олмадик», — дея хулоса қилди Кличко.
Аввалроқ Кличко Киевда электр узилишлари баҳоргача давом этиши мумкинлигини айтганди. У аҳолини озиқ-овқат ва сув захирасини тўплашга чақирганди.
«Мабодо ёмон сценарий юз берган тақдирда, ҳамма шаҳар четидаги сув, печкаси бор уйига ёки дўстлариникига бора олса яхши бўларди. Аммо биз энг ёмон ҳолат содир бўлмаслиги учун қўлимиздан келганини қиляпмиз», — деган Киев мэри.
Россия мунтазам равишда Украинанинг энергетика инфратузилмасига қарши оммавий зарбалар бермоқда. Оқибатда Украина шаҳарлари ёруғлик, иссиқлик ва сувсиз қолмоқда. Украина ҳукумати «бузилмас пунктлар» — иссиқлик ва электр энергияси билан узлуксиз таъминланадиган жойларни ташкил қилган. 25 ноябрь куни Украина президенти Владимир Зеленский бундай пунктлар ёмон жойлаштирилгани учун Киев расмийларини танқид қилганди.
Изоҳ (0)