Жаҳон соғлиқни сақлаш ташкилоти (ЖССТ) Ўзбекистонда «ДОК-1 Макс» сиропини қабул қилиш ортидан вафот этган болалар ўлими юзасидан Ўзбекистон расмийлари билан алоқадалигини маълум қилди. Бу ҳақда ANI news хабар берди.
«Биз Ўзбекистон расмийлари билан алоқадамиз. Ҳали ҳам маълумот йиғиш ва уларни тасдиқлаш жараёнидамиз», — дея ЖССТ нашрга маълумот берди.
Ҳиндистон ҳукумати «Док-1 Макс» дорисини ишлаб чиқарган Marion Biotech компаниясига қарши суриштирув бошлаган, компания «Док-1 Макс» дорисини ишлаб чиқариши тўхтатилган. Суриштирув Ҳиндистоннинг Уттар-Прадеш штатидаги препаратларни лицензиялаш ва назорат қилиш бошқармаси томонидан олиб борилмоқда. Улар Ўзбекистон ҳукуматидан ҳам ушбу дори оқибатида вафот этган болалар ҳақида ҳисобот сўраган.
«Вафот этганлар учун афсусдамиз, ҳукумат тергов олиб бормоқда. Унинг натижаларидан келиб чиқиб, тегишли чораларни кўрамиз. Намуналар олинди. Бу маҳсулотни ишлаб чиқариш тўхтатилди, қолган жараёнлар давом этмоқда», — деган Marion Biotech компанияси раҳбари Ҳасан Ризо АНИ билан суҳбатда.
29 декабрда Ҳиндистоннинг Тошкентдаги элчихонаси «Док-1 Макс» сиропини истеъмол қилиш ортидан Ўзбекистонда болалар вафот этганига ҳамдардлик билдириб, воқеани кузатиб боришини таъкидлаган.
ANI news’нинг таъкидлашича, Ҳиндистон Соғлиқни сақлаш вазирлиги 27 декабрдан буён Ўзбекистон расмийлари билан мунтазам алоқада.
Эслатиб ўтамиз, Ҳиндистонда ишлаб чиқарилган «Док-1 Макс» сиропини истеъмол қилиш ортидан ҳозирча Самарқандда 18 нафар, Қашқадарёда бир нафар, жами 19 нафар бола вафот этгани маълум қилинган.
Давлат хавфсизлик хизмати томонидан «Док-1 Макс» препарати билан боғлиқ ҳолат юзасидан жиноят иши қўзғатилган. Ўзбекистонда «Док-1 Макс»ни ишлаб чиқарган компанияга тегишли барча дорилар савдоси вақтинча тўхтатилди.
Шавкат Мирзиёев 30 декабрдаги йиғилишда Фармацевтика тармоғини ривожлантириш агентлиги раҳбари Сардор Кариев ишдан олди. Президент йиғилишда соғлиқни сақлаш соҳасига тўхталиб, «Док-1 Макс» препаратини қабул қилиш оқибатида болалар ҳаётдан кўз юмгани билан боғлиқ вазиятни қаттиқ танқид қилди.
«Самарқанд ва Қашқадарёдаги болалар ўлими соҳада ишлар аҳволини, назорат йўқлигини кўрсатди. Бугун Фармацевтика агентлиги раҳбари Кариевни ишдан олдим. Бунга йўл қўйган мутасаддиларнинг ҳаммаси қонун олдида жавоб беради!», — деди президент.
Сардор Кариев 2019 йилнинг февралидан буён Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори лавозимида фаолият юритиб келаётганди.
Изоҳ (0)