Ижтимоий тармоқларда Оҳангарондаги газ қуйиш шохобчасида жанжал акс этган видео тарқалганди. Тошкент вилояти ИИББ матбуот хизмати ҳолат юзасидан расмий маълумот берди.
Ўрганишлар натижасида воқеа автомобилларга газ қуйиш жараёни ёки у ерда навбат талашган ҳайдовчилар билан боғлиқ эмаслиги аниқланган.
Маълум бўлишича, Оҳангарон тумани «Шодмалик» маҳалласида ўтказилган тўй маросимида хонадонга меҳмон сифатида келган куёвнинг жўралари ва келиннинг синфдош дўстлари ўзаро тортишиб қолган.
Шундан сўнг, улар тўй бўлаётган хонадон яқинида жойлашган, ҳозирги кунда таъмирлаш ишлари сабаб иш фаолиятида бўлмаган газ қуйиш шохобчаси ҳудудига ўтиб, бир-бирлари билан уришиб, жанжаллашган.
Ушбу воқеа юзасидан ҳудудий ички ишлар бўлимига бирор хабар келиб тушмаган.
Ҳозирда, жанжалда иштирок этганларнинг барчаси ўрнатилган тартибда жиноят ишига жалб этилиб, туман ички ишлар бўлими томонидан Жиноят кодексининг 277-моддаси, 2-қисми «б» банди билан жиноят иши қўзғатилган. Тергов ҳаракатлари олиб борилмоқда.
Изоҳ (0)