2022 йилнинг ўтган даври мобайнида Давлат тест маркази томонидан жами 52 турда (баъзи турлари йил давомида, баъзилари ҳар ойда 2 маротаба) тест синовлари ўтказилди. Уларда 2 млн нафардан ортиқ талабгор иштирок этди.
Жумладан, 2022 йил 25 январь—9 февраль оралиғида Ўзбекистон Республикаси Қуролли Кучлари сафида муддатли ҳарбий хизматни тугатаётган 22 000 нафарга яқин ҳарбий хизматчиларнинг жанговар ва маънавий-маърифий тайёргарлигини аниқлаш бўйича тест синовлар ўтказилди. Тест синовлари республика ҳудудларида 6 та вазирлик ва идораларга қарашли 187 та ҳарбий қисмда Давлат тест маркази ходимлари иштирокида жойлар (ҳарбий қисмлар)да ўтказилди.
Ўзбекистон Республикаси президентининг 2021 йил 30 ноябрдаги ПҚ-23-сон қарорига асосан апрель ойида 534 нафар Профилактика (катта) инспекторларига юриспруденсия соҳасида бакалавриат таълим йўналиши бўйича сиртқи таълим шаклига ўқишга тавсияномалар бериш учун тест синовлари ўтказилди.
Шунингдек, давлат олий таълим муассасаларининг бакалавриат таълим йўналишларига 1 146 574 нафар абитуриент учун август ойида, Президент мактаблари ва Президент таълим муассасалари агентлиги қошидаги таълим муасасаларига қабул қилиш бўйича 314 052 нафар талабгорлар учун тест синовлари ташкил этилди ва ўтказилди (бунинг учун Марказ ходимлари 2022 йил 10 июлдан 31 августга қадар махсус ёпиқ иш режимида фаолият олиб борди).
Мазкур тест синовлари учун республика бўйича 58 та бино, стадион ва хиёбон танлаб олиниб, мазкур жойлар маҳаллий ҳокимликлар билан ҳамкорликда тест синовларига тўлиқ тайёрланди. Бунда бир сменада 48 420 нафар, бир кунда эса 96 840 нафар абитуриент тест синовида иштирок этиши таъминланди. Тест синови ўтказилган бинолар 1 933 та видеокузатув камераси ва шахсни идентификасиялаш қурилмалари билан жиҳозланди.
Профессионал таълим муассасаларига ўқишга қабул қилиш бўйича 230 390 нафар абитуриент онлайн рўйхатдан ўтказилди, 172 997 нафар абитуриент тест синовларидан ўтказилди.
12 та умумтаълим фанидан 74 600 та, 54 та махсус фандан 12 854 та ва миллий сертификат бериш учун 4 та умумтаълим фанидан (математика, физика, кимё, биология) 1 800 та тест топшириғи шакллантирилди ва экспертизадан ўтказилди. 12 минг нафардан ортиқ талабгор учун миллий сертификат бериш бўйича тест синовлари ўтказилди.
14 та чет тили бўйича 63 600 нафарга яқин талабгорнинг 4 та кўникма бўйича чет тилини билиш даражаси аниқланди.Жумладан, 4,6 минг нафар академик лисей битирувчисининг, 3,5 минг нафар чет тиллари ўқитувчисининг, хорижий тиллар бўйича мутахассисларни тайёрлашга ихтисослашган 6 та олий таълим муассасасига ҳужжат топширган 8,5 мингга яқин абитуриентнинг, 47 минг нафарга яқин турли тоифадаги талабгорнинг чет тилини билиш даражаси аниқланди.
2022 йилнинг сентябрь декабрь ойлари давомида ҳар ойда икки маротаба чет тилини билиш даражасини аниқлаш бўйича тест синовлари ўтказилиб, шу кунга қадар 22 869 нафар талабгор учун тест синовлари ўтказилди. Бу ўтган йилнинг (3 590 нафар) мос даврига нисбатан 19 279 нафарга ёки 84 фоизга ошганини кўрсатмоқда.
Август ойида хорижий олий таълим ташкилотларидан республика давлат олий таълим муассасаларига ўқишини кўчириш бўйича 80182 нафар, Адлия вазирлигининг юридик техникумларига қабул учун 22 809 нафар, ИИВ, «Темурбеклар мактаби» ва «Ёш чегарачилар» ҳарбий академик лицейларига қабул учун 11 571 нафар талабгор иштирокида тест синовлари ўтказилди.
Раҳбар кадрлар ва масъул лавозимларга тайинланадиган шахсларнинг давлат тилини билиш даражасини аниқлаш бўйича февраль ва ноябрь ойларида 1 164 нафар талабгор тест синовидан ўтказилди.
Декабрь ойида Халқ таълими вазири жамғармаси ҳисобидан тўланадиган ҳар ойлик устамаларга номзодларнинг дарс берадиган умумтаълим фани бўйича билим даражасини баҳолаш бўйича 6 000 нафарга яқин педагог ходим 26 та умумтаълим фанлари бўйича тест тест синовидан ўтказилди.
Умумий қилиб айтганда, январь ойида 6 марта, февраль ойида 5 марта, март ойида 3 марта, апрель ойида 6 марта, май ойида 6 марта, июнь ойида 5 марта, июль ойида 9 марта, август ойида 17 марта, сентябрь ойида 4 марта, октябрь ойида 3 марта, ноябрь ойида 4 марта, декабрь ойида 3 марта тест синовлари ўтказилди. Бундан ташқари жорий йил якунига қадар (27—28 декабрь кунлари) яна 10 мингдан ортиқ талабгорни тест синовидан ўтказиш режалаштирилган.
Изоҳ (0)