«Дарё» журнали Ўзбекистоннинг жаҳон иқтисодиёти майдонига кириб боришдаги ҳаракатлари ҳақида Москвада фаолият олиб бораётган иқтисодчи Жамшид Муслимов билан суҳбат уюштирди.
Суҳбат мавзуси Ўзбекистонда ўтказилаётган иқтисодий учрашувлар, халқаро шартномалар ва мамлакатдаги иқтисодий вазият бўлди. Таҳлил давомида ҳаракатлар қанчалик ўзини оқлаши мумкинлиги, соҳанинг ривожланишига тўсиқ бўлаётган омиллар, шартномаларнинг реал амалиётдаги аҳамияти масалаларига тўхталинди.
Ўзбекистоннинг халқаро иқтисодий ҳамжамиятда имзолаётган хусусийлаштириш, давлат хусусий шериклиги ва кредит линияларига оид шартномалари ҳақида сўз юритилиб, ушбу тушунчаларнинг моҳияти бир қадар очиқланди. Иқтисодчи айни пайтда маҳаллий шароитга эътибор қаратиб, хусусийлаштиришда имкониятни маҳаллий тадбиркорларга бериш ва хориж сармоядорлари билан ишлаш кўникмалари ҳақида фикрлари билан ўртоқлашди.
Прогнозлаштириш ва макроиқтисодий тадқиқотлар институти ходимининг айтишича, Ўзбекистон ҳозирги геосиёсий вазиятдан келиб чиқиб логистика тизимини қайта кўриб чиқишда ҳам қатор ишларни бошлаган. Шунга кўра суҳбатда Афғонистондаги сиёсий вазият ва унинг иқтисодий имкониятлари масаласи ҳам таҳлил қилинди.
Жаҳон бозорида ўз ўрнини топиш масаласи давлатнинг келгусидаги тараққиётига сабаб бўладиган муҳим жиҳат. Хўш, Ўзбекистон бу жараёнда қайси соҳалар орқали имкониятларини ўрганиши керак? Иқтисодий аудиторияда кўпчилик талаби бўлган маҳсулот қандай топилади?
«Дарё» журнали тажриба ва таҳлил талаб этадиган шу каби саволларга соҳа мутахассисларидан жавоб қидиришда давом этади.
Изоҳ (0)