Тошкент туманлараро иқтисодий судида «Анорбанк» даъвосига кўра бошланган суд аввалига очиқ суд мажлиси тарзида ўтаётган бўлса, бугунги мажлисда «Анорбанк» вакиллари киритган илтимосномага биноан ёпиқ тарзида давом этадиган бўлди. Бу ҳақда суд жараёнида иштирок этган «Дарё» журналисти хабар берди.
Маълум бўлишича, «Анорбанк» Sof.uz сайтида эълон қилинган «Анорбанк»нинг ‘молиявий фокуслари’ мижозларни нега ғазаблантирди?» сарлавҳали мақолага эътироз билдириб, «мазкур мақола сабаб тижорат бозоридаги обрў-эътиборимизга путур етказилди ва натижада 10 миллиард сўм моддий зарар кўрдик», деган важ билан судга шикоят киритган. Банк шунингдек, сайт жамоаси банкка маънавий зарар ҳам етказганини рўкач қилиб, қўшимча яна 5 миллиард, жами 15 миллиард сўм моддий-маънавий зарар ундириш тўғрисида даъво киритган.
Суд аввалида сўз олган «Анорбанк» вакиллари суд мажлисида банк сирига оид далиллар ҳам янграшини инобатга олиб, суд жараённи ёпиқ тарзда давом эттириш бўйича илтимоснома киритди. Жавобгар томонлар суддан илтимосномани рад этишни сўради. Суд эса қисқа муддатли маслаҳат мажлисидан сўнг жараённи ёпиқ суд тарзида давом эттириш ҳақида ажрим чиқарди. Бу эса ОАВ вакиллари ва жамоатчилик эътирозига сабаб бўлди.
Очиқ суд мажлислари бўлиши ва можароли ҳолатлар очиқ судда кўрилиши нормал ҳолат. Ҳозирги ҳолатда банк томони ёпиқ суд мажлисини ўтказиш бўйича илтимоснома киритди ва бунга учта асос кўрсатишга уринди. Банк тижорат сири деган важни ўртага ташлаяпти, биламизки тижорат сири масаласидаги қонунда мавҳумлик кўп. Шу сабаб судья банк илтимосномасини қайси асосларга кўра қаноатлантирганини аниқ тушунтириб бериши керак эди. Бироқ, бундай бўлмади. Шунинг учун жамоатчилик вакилларининг саволлари очиқ қолди. Судьянинг ҳаракати очиқлик сиёсатига қарши иш бўлди деб ўйлайман. Худдики, судья ёпиқ суд қилиб, тинчгина барчасини ҳал қилай дегандек бўлди, — дейди ҳуқуқшунос Баҳодир Аҳмедов.Ҳуқуқшунос блогер Зафарбек Солижонов очиқ суд мажлисининг биргина илтимоснома билан ёпиқ суд мажлисига айлантирилиши унда кўплаб саволлар туғилишига сабаб бўлганини таъкидламоқда.
Даъвогар томон ўз илтимосномасини киритди. Судья эса бу илтимосномани қаноатлантирди. Бу ҳолат бўйича менда иккита савол туғиляпти. Биринчиси, аввалроқ яъни дастлабки суд мажлисида Узрепорт канали вакиллари иштирок этиб, жараённи ёритган. Ўша суд мажлисида ҳам банк сири билан боғлиқ жараён очиқланган-ку, нега энди холис ОАВ вакиллари келганда энди банк сири деган важ ўртага ташлади? Иккинчидан, аслида даъвогар шунча ОАВ олдида ўз номини оқлаб, одил суд қарорини чиқартирса, шу платформа банкнинг номини оқлаб олишига замин яратар эди-ку, Нега банк бундан фойдаланмаяпти?, — дейди ҳуқуқшунос блогер Зафарбек Солижонов.
Изоҳ (0)