Ўзбекистонда 2023 йил 1 январдан бошлаб барча вазирликларнинг штатлари 30 фоизгача қисқартирилиши ҳақида хабар берилган эди. Молия вазири ўринбосари Одилбек Исоқов бунинг натижасида бюджетнинг 2,8 триллион сўм маблағи тежалишини айтди.
Халқаро пресс-клубнинг 26 декабрь куни ўтказилган навбатдаги сессиясида қатнашган вазир ўринбосарининг қайд этишича, бундай маъмурий ислоҳотларни амалга ошириш натижасида давлат ғазнаси маблағлари қуйидагича тежалади:
- вазирлик ва идоралар штат бирлигини 30 фоизгача қисқартириш ҳисобига 2,4 триллион сўм;
- ташкилот ва идораларни мақбуллаштириш ҳисобига бўшайдиган 300 дан ортиқ биноларни сотишдан 300 миллиард сўм;
- раҳбар лавозимларини қисқартириш орқали тахминан 55 та автомобилларни аукционда сотиш ҳисобига 16 миллиард сўм;
- ҳудудларга хизмат сафарларини қисқартириш, жойлардаги муаммоларни онлайн қабул ёки виртуал ташриф каби замонавий технологиядан фойдаланиш орқали қарийб 17 миллиард сўм;
- давлат бошқаруви аппаратини сақлаш билан боғлиқ харажатларини мақбуллаштириш ҳисобига 22 млрда сўм;
- расмий тадбирларни ўтказиш бўйича харажатларни мақбуллаштириш ҳисобига 18 миллиард сўм.
Эслатиб ўтамиз, «Янги Ўзбекистон маъмурий ислоҳотларини амалга ошириш чора-тадбирлари тўғрисида»ги фармонга кўра, вазирликлар сонини 25 тадан 21 тагача қисқартирилади. Маъмурий ислоҳотлар биринчи босқичида республика ижро этувчи ҳокимият органларини 2023 йил 1 январга қадар, иккинчи босқичида эса маҳаллий давлат ҳокимияти органларини 2023 йил 1 апрелга қадар ислоҳ қилиш бўйича чоралар кўрилишини таъминлайди.
Мавзуга доир:
Изоҳ (0)