Эрон Ташқи ишлар вазирлиги расмий вакили Носир Қанаъний мамлакат Россия ва Украина ўртасидаги низода иштирок этмаётганини айтди. Бу ҳақда Эрон республикаси ахборот агентлиги (IRNA) хабар бермоқда.
Унинг сўзларига кўра, ҳарбий низо юзасидан Эронга нисбатан ҳар қандай орган томонидан таҳдидли баёнот учун масъулият Украина зиммасига юкланади.
«Кимнидир, бировни, Эронни айблаш Украинага, унинг халқига, раҳбариятига ёрдам бермайди. Биз Украина раҳбариятининг айбловларини рад этамиз. Яна бир марта таъкидлайман: биз Украинадаги низода қатнашмаяпмиз, биз инқирозни ҳал қилиш ва бу мамлакатда тинчлик ўрнатилишига ёрдам беришга тайёрмиз… Қайси орган томонидан айтилаётган бўлса-да, таҳдидли баёнотларни масъулиятсизлик деб ҳисоблаймиз ва бундай баёнотларнинг ҳуқуқий ва сиёсаий оқибатлари учун жавобгарликни Украина ҳукумати зиммасига юклаймиз», — деди Носир Қанаъний.
Ғарб мамлакатлари Эронни Украинадаги ҳарбий низода қўллаш учун Россияга учувчисиз учар қурилмалар етказиб беришда айбламоқда. Эрон ва Россия буни рад этмоқда. Эрон ҳукумати дронлар етказиб берилганини тан олганди, аммо, уларнинг сўзларига кўра, қурол-яроғ ҳарбий ҳаракатлар бошланишидан олдин юборилган.
24 декабрь куни Украина президенти офиси раҳбарининг маслаҳатчиси Михаил Подоляк Эрон Россияга дронлар етказиб бериш ҳажмини оширмоқчи эканини маълум қилди. У Эроннинг дронлар ишлаб чиқарувчи заводларини йўқ қилиб, учар қурилмалар етказиб берувчиларни ҳибсга олишга чақирди.
Аввалроқ Эрон Ташқи ишлар вазирлиги Украина президенти Владимир Зеленскийнинг АҚШ Конгрессидаги нутқини танқид қилган эди. Танқидга Зеленский Украинага қарши урушда фойдаланиш учун Эрон Россияга дронлар етказиб бераётгани ҳақида гапиргани сабаб бўлган.
Изоҳ (0)