“Rossiya bahorda yangi hujum boshlash uchun Ukrainadagi urushni muzlatmoqchi” — Stoltenberg
Rossiya Ukrainadagi urushni qishda muzlatib qo‘yishga harakat qilmoqda, bu esa o‘z kuchlarini qayta tiklash va bahorda yangi hujumni boshlashga imkon beradi. Bu haqda NATO bosh kotibi Yens Stoltenberg Financial Times nashriga bergan intervyusida ma’lum qildi.
Stoltenbergning so‘zlariga ko‘ra, Rossiya urushni hech bo‘lmaganda qisqa muddatga to‘xtatib qo‘yishga harakat qilmoqda.
“Shunda ular qayta guruhlarga bo‘linib, harbiy texnikalarni tiklab, keyingi bahorda kattaroq hujum boshlashga harakat qilishi mumkin”, — deydi NATO bosh kotibi.
U qishda Ukrainadagi jangovar harakatlar tinchroq fazaga o‘tishini prognoz qildi. Biroq Ukraina va Rossiya qo‘shinlari o‘z kuchlarini qayta to‘plash va qurollantirish niyatidaligi, shu uchun G‘arb ittifoqchilari Ukrainaga yordam berishda davom etishi kerakligini aytdi.
Stoltenberg Rossiya hozirda tinchlik muzokaralariga tayyorlik ko‘rsatmayotganini ham qo‘shimcha qildi. Uning fikricha, Ukrainadagi urush diplomatiya yo‘li bilan tugaydi, lekin buning uchun birinchi navbatda jang maydonida g‘alaba bo‘lishi kerak.
“Ko‘pgina urushlar, xususan, Ukrainadagi ham muzokaralar stolida tugaydi, ammo bu stolda nima sodir bo‘lishi butunlay jang maydonidagi vaziyatga bog‘liq”, — deydi Yens Stoltenberg.
Mavzuga doir:
- NATO bosh kotibi Ukraina uchun qish “dahshatli” boshlanishi haqida gapirdi
- Ukrainadagi urush qishda qanday kechishi prognoz qilindi
