Беларусь раҳбари Александр Лукашенко 24 декабрь куни Россияга амалий ташрифини бошлайди. Бу ҳақда «Пул Первого» хабар берди.
Лукашенко Москвада Россия президенти Владимир Путин билан учрашиши, МДҲ давлатлари раҳбарлари иштирокидаги норасмий тадбирда иштирок этиши, космонавтлар тайёрлаш марказига ташриф буюриши кутилмоқда.
«Лукашенко эртага (24 декабрь) Россияга амалий ташриф билан боради», — дейилади хабарда.
Журналистларнинг ёзишича, Путин таклифига биноан Лукашенко Москва вилоятидаги космонавтлар тайёрлаш марказига боради, у ерда Беларусдан коинот парвозлари учун номзодлар сараланмоқда. Сиёсатчи марказ фаолияти, космонавтларни танлаш ва тайёрлаш тизими билан танишади, Беларусь ва Россиянинг космик соҳадаги ҳамкорлиги истиқболларини муҳокама қилади.
Бундан ташқари, Лукашенко 26-27 декабрь кунлари Санкт-Петербургда бўлиб ўтадиган МДҲ давлатлари раҳбарларининг норасмий учрашувида иштирок этади. Йиғилиш иштирокчилари йил якунларини сарҳисоб қилади ва ҳамкорлик режаларини муҳокама қилади.
Путин 19 декабрь куни Лукашенко билан учрашиш учун Минскка келганди. Томонлар мудофаа соҳаси, Россия газ таъминоти, атом энергетикаси ва бошқа соҳалардаги ҳамкорликни муҳокама қилган.
Изоҳ (0)