Тошкент вилоятининг Қуйи Чирчиқ туманида дарахтлар ноқонуний кесиб кетилгани аниқланди. Бу ҳақда вилоят Экология ва атроф-муҳитни муҳофаза қилиш бошқармаси матбуот хизмати хабар қилди.
Маълум қилинишича, бу ҳақда ижтимоий тармоқларда хабар тарқалгач, Тошкент вилояти Экология ва атроф-муҳитни муҳофаза қилиш бошқармаси Қуйи Чирчиқ туман бўлими ҳамда Тошкент вилояти Табиатни муҳофаза қилиш прокуратураси масъуллари томонидан жойига чиқиб ўрганиш олиб борилди.
Ўрганиш давомида «Маданият» МФЙ ҳудудидан ўтувчи автомобиль йўли қатнов бўйидаги жами 7 дона шумтол номаълум фуқаролар томонидан 20 декабрдан 21 декабрга ўтар кечаси кесиб кетилгани аниқланган. Ҳолат юзасидан тегишли тартибда далолатнома расмийлаштирилиб, табиатга этказилган зарар миқдори 394 миллион сўм, деб баҳоланган.
Қайд этилишича, айни пайтда суриштирув ишлари олиб борилмоқда. Ўрганиш натижалари юзасидан қўшимча маълумот берилади.
Бундан аввал Тошкент вилоятининг Паркент туманида 57 туп кўп йиллик соғлом дарахтлар таг қисмидан ноқонуний кесилгани аниқланганди.
Мавзуга доир:
Изоҳ (0)