Туркманистонда Ахал вилоятининг янги қурилаётган маъмурий маркази республика собиқ президенти, Халқ Маслаҳати Миллий Кенгаши (Туркманистон парламенти юқори палатаси)нинг амалдаги раҳбари Гурбангули Бердимуҳамедов шарафига Арқадағ деб номланди. Бу ҳақда Turkmenportal хабар бермоқда.
Тегишли қарор Миллий Кенгаш Мажлиси (қуйи палата) томонидан «Ахал вилояти ва мамлакатнинг бошқа вилоятлари аҳолисининг хоҳиш-истаклари ҳамда жамоат ташкилотлари таклифларини инобатга олган ҳолда» қабул қилинган.
Арқадағ шаҳрининг қурилиши 2019 йил апрель ойида бошланган. Шаҳар икки босқичда қурилмоқда, биринчи босқични декабрь ойида топшириш режалаштирилган. Режаларга кўра, у «ақлли шаҳар» бўлиши керак. Бу ерда электробуслар ва электромобилларнинг ҳаракати ташкил этилади, қуёш панеллари ва шамол генераторлари пайдо бўлади.
2022 йилнинг декабрь ойи бошида Гурбангули Бердимуҳамедов республика Ташқи ишлар вазирлиги раҳбари Рашид Мередовга янги шаҳарни Гиннеснинг рекордлар китобига минтақадаги «энг катта, энг ноёб ва гўзал шаҳар» сифатида киритиш масаласини ҳал этиш бўйича топшириқ берган эди.
Изоҳ (0)