Isroil sobiq bosh vaziri, “Likud” partiyasi rahbari Benyamin Netanyaxu mamlakatda yangi Vazirlar Mahkamasi tuzilganini ma’lum qildi. OAV xabarlariga ko‘ra, yangi hukumat tarkibiga o‘ng qanot konservativ blok, jumladan, “Diniy sionizm” partiyasi vakillari kiradi.
“Oxirgi saylovlarda biz erishgan ulkan jamoatchilik qo‘llab-quvvatlovi tufayli men Isroilning barcha fuqarolari manfaati uchun ishlaydigan hukumatni yaratishga muvaffaq bo‘ldim”, — deb yozdi Netanyaxu o‘zining Twitter’ida. Shuningdek, u o‘z postiga Isroil prezidentiga qo‘ng‘irog‘i audiosini ilova qilgan.
Netanyaxu prezident Isxak Gersogga “Likud” fraksiyalari, “Diniy sionizm”, “Shas”, “Yahadut xa-Tora”, “Otsma Yehudit” va “Noam” partiyalarini o‘z ichiga olgan yangi hukumat barcha Isroil fuqarolari manfaati uchun ishlashini aytdi, deyiladi Jerusalem Post gazetasida.
Netanyaxuning yana bosh vazir lavozimini egallashi uchun so‘nggi sana 2-yanvar bo‘lishi taxmin qilingandi. Biroq ko‘plab xabarlarga ko‘ra, yangi koalitsiya kelasi hafta oxirigacha hukumat qasamyodini o‘tkazishga urinmoqda.
Netanyaxuning hukumat tuzish mandati 11-dekabrda tugagan. Keyinchalik Gersog unga yana o‘n kun vaqt bergan.
Isroil qonunchiligiga ko‘ra, agar bosh vazirlikka nomzod belgilangan muddatda hukumat tuza olmasa va uning tarkibini parlamentda tasdiqlata olmasa, prezident bu vazifani boshqa nomzodga topshirishi mumkin.
Izoh (0)