Музлаткичдаги озиқ-овқатни сақлашда кўплаб уй бекалари хатоликка йўл қўяди, бу эса маҳсулотларнинг сифати бузилишига сабаб бўлади. Marie Claire нашри шу хатоликлар ҳақида маълумот берди.
Сақлаб қўйилган маҳсулотлар фойдалилик даражасини йўқотади. Озиқ-овқат маҳсулотлари янги ҳолатда истеъмол қилинганда фойдали бўлади. Бироқ ҳамма нарсани пишган заҳоти бирданига ейиш мумкин эмас. Хона ҳароратида бактериялар кўпайиши туфайли озиқ-овқат бузилади. Шунинг учун уларни узоқ вақт давомида янги сақлаш учун музлатгичга жойлаштириш керак. Музлаткич камераси ичида ҳарорат хона ҳароратидан анча паст бўлиб, бу бактериялар кўпайишини чеклайди, бироқ музлаткич фақат озиқ-овқат тўғри сақланган пайтда фойдали бўлиши мумкин.
Музлаткич яхши совитмаяпти ёки тўғри ишламаяпти, компрессор билан боғлиқ муаммолар туфайли озиқ-овқатнинг сифати бузилади, деган шикоятларни тез-тез эшитган бўлсангиз керак. Озиқ-овқатларни музлаткичда тўғри жойда сақлаётганингизни текширганмисиз? Маҳсулотларнинг сақланиш муддати бевосита ушбу омилга боғлиқ.
Сут, творог ва пишлоқ каби сут маҳсулотлари имкон қадар салқин жойда сақланиши керак. Шунинг учун уларни ҳарорат энг паст бўлган жавонга жойлаштирган маъқул. Агар сизда эски услубдаги музлаткич бўлса, музлатиш жойи ичкарида ва тепада бўлса, бу энг юқори токча ҳисобланади. Сут маҳсулотларини баъзи пишириқларни тайёрлашда ишлатмоқчи бўлсангиз музлаткичга қўйманг, пишлоқ бундан мустасно.
Гўшт маҳсулотлари сифати тез бузиладиган маҳсулотлар таркибига киради. Гўштни музлаткичда узоқ вақт сақласа бўлади. Бу нафақат маҳсулотнинг сифати бузилишидан, балки бошқа муаммолардан ҳам ҳимоя қилади: агар гўшт қадоқланган бўлса, у бошқа маҳсулотларга зарар етказмайди.
Нон, печенье ёки бошқа ширинликларни музлаткичда узоқ муддат сақламанг. Эътибор беринг, улар бундай муҳитда нам бўлиши мумкин.
Тухумлар доимий ҳароратли жойда бўлса, узоқроқ сақланади. Шунинг учун музлаткич эшигига тухумни қўйманг, чунки ҳар сафар очилганда ҳарорат ўзгаради. Уларни ҳарорат барқарорроқ бўлган музлаткичнинг орқа томонида сақлаш керак.
Мева ва кўкатлар энг яхши жой — пастки жавон. Бу зонада намлик назорат қилинади, шунинг учун улар янги ва қарсиллаган ҳолатда сақланиб туради.
Сифати тез бузилмайдиган газланган ичимликлар эшик токчасига жойлаштирилиши мумкин. Бу ерда ҳароратнинг максимал ўзгариши содир бўлади, бироқ кола каби газланган ичимликларга бу таъсир қилмайди, шунинг учун улар жуда узоқ вақт давомида сақланиши мумкин.
Музлаткичга ҳеч қачон иссиқ овқатни қўйманг. Уларни хона ҳароратига қадар совутиб, кейин музлаткичга қўйинг.
Юқоридаги маслаҳатларга амал қилиш орқали нафақат озиқ-овқат ва ичимликларингизни узоқроқ вақт давомида янги сақлашингиз мумкин, балки музлаткичингиз, унинг компрессорининг самарали, муаммосиз ишлашини ҳам таъминлаган бўласиз. Музлаткични мунтазам тозалаш ҳам муҳим иш эканини унутманг.
Мавзуга доир:
Изоҳ (0)