Шимолий Корея Япон денгизи томон номаълум баллистик ракетани учирди, деб хабар бермоқда Yonhap агентлиги Жанубий Корея ҳарбийларига таяниб.
Жанубий Корея Бирлашган штаб бошлиқлари қўмондонлиги ракета бўйича батафсил маълумот бермади.
Пхеньян томонидан баллистик ракетага ўхшаш ракета учирилгани ҳақида Япония ҳукумати томонидан ҳам маълум қилинди, деб ёзмоқда NHK. Исмини ошкор этмаган расмийларга кўра, ракета Япониянинг эксклюзив иқтисодий зонасидан ташқарига тушган.
Япония қирғоқ қўриқлаш бошқармаси тахминан ярим соатдан кейин иккинчи баллистик ракета учирилганини маълум қилди. Япония расмийларига кўра, иккинчи ракета ҳам Япониянинг эксклюзив иқтисодий зонасидан ташқарига қулаган.
Пхеньян томонидан аввалги ракета бир ой олдин учирилганди. 18 ноябрь куни Шимолий Корея мамлакат етакчиси Ким Чен Ин бошчилигида янги турдаги қитъалараро «Хвасон-17» баллистик ракетасини синовдан ўтказди. Ракета Пхеньян халқаро аэропортида учирилди ва 4135 сония парвоз қилди. Парвоз масофаси 998 км, баландлиги эса 6040,9 км бўлди. Снаряд Япон денгизидаги Корея ҳудудининг белгиланган очиқ денгиз акваториясига қулаган.
ОАВ ёзганидек, ракета синовлари Корея яриморолидаги вазиятни «хавфли чегарага» олиб келган АҚШ ва бошқа «душман кучлар»нинг «ҳарбий қарама-қаршилик истерияси» фонида ўтказилди. Пхеньян ракета учирилишини «суверен давлатнинг ўзини ҳимоя қилиш ҳуқуқи» деб ҳисоблайди.
Изоҳ (0)