«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.
Барногул Санакулова зўравонлик мавзусида фақат аёлларга эътибор қаратилиб, эркаклар ҳақида гапирилмаётгани, ваҳоланки, эркаклар зўравонлиги ҳам чуқур ўрганилиши керак бўлган масала эканлигига тўхталди.
Эркакларга нисбатан бўлаётган зўравонлик масаласини кўтариб чиқиш ва буни фундаментал таҳлил қилишимиз керак. Чунки бизда эркак киши кимгадир муаммосини айтиши уят ҳисобланади, эркак мард бўлиши керак, сиқилмаслиги керак деган стереотипларни яратиб қўйиб, уларни эшитаётганимиз ҳам йўқ. Уларнинг орасида аёллар тазйиқи остида зўравонликка учраётганлари бўлиши мумкин.
Мисол учун, рафиқаси эр кишининг ҳамияти юқорилигини била туриб, уни бошқалар билан солиштиради, «Менга ҳеч нима олиб беролмадинг, ҳаётим сен билан боғланганидан буён рўшнолик кўрмадим», деяверишидан эркак руҳий зўравонликка учраяпти. Муттасил таъна-дашном эшитган эркак ўзини камситилган, руҳан эзилган ҳис қилади, қанчалик омадсиз эканлигини ўйлаб кун ўтказади. Лекин бу ҳақда гапиролмайди, агар гапирса, эркак ҳам шундай бўладими, дея уялтирамиз, гапиролмаса, ўз вазифасини бажармаяпти, деб яна маломат қиламиз.
Балки эркакнинг кўп пул тополмаётгани, оиласини етарлича таъминлаб беролмаётганининг сабаби унинг болалигига, ота-онасига бориб тақалар. Ўзини бошқа соҳада кўрсатоладиган йигитни мажбуран, пул билан бошқа соҳага ўқишга киритиб қўйишгандир-у, молиявий «ҳомий» – ота-она вафот этгач, у ўз йўлини йўқотиб қўйгандир. 30 ёшли мана шу йигит неча йиллик зўравонликнинг қурбони ва маҳсулоти ҳисобланади. Агар бугун шу мавзуни гапирмасак, ечим топмасак, келажакда худди шундай минглаб, миллионлаб фуқароларга эга бўлиб қоламиз, – дейди профессор.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)