«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.
Иқтисодчининг таъкидлашича, аёллар ва болаларга зўравонлик мавзуси ҳақида фақатгина гапириш, муносабат билдириш эмас, масалага ечим ва таклифлар бериш муҳим.
Йўл қўяётган камчилигимиз ҳам – «ҳисоботдан ҳисоботга» қабилида яшаётганимиз. 10 декабрь куни бутун дунёда зўравонликка қарши курашиш ойлиги тугади. Ана энди биз гапирамизми, деган савол кун тартибига чиқяпти. Гапириш қайсидир тўртта блогерга қолиб кетиши керак эмас. Айримлар бу мавзуни аудитория йиғиш учун гапиради. Таҳлил қилиб кўрсангиз, аудиторияси кенг ва бу мавзуга тез-тез мурожаат қилиб турадиган блогерлар, ижтимоий фаолларнинг асосий контенти ушбу масала кўтариб чиқилгач йиғилганига гувоҳ бўласиз.Муаммони тақдим этиш, бу ҳолатга нисбатан инсонларнинг раҳмини келтириш, ғазабини ошириш, муносабатини кенгайтириш яхши. Лекин ечим берилмаса, муаммонинг туб моҳияти қаердан келиб чиқаётгани, эртага кутилмаганда яна қаерда муаммо келиб чиқиши мумкинлиги ҳақида гапирилмаса ва даврий равишда амалга оширилмаса, бу контент қулоқларнинг қотишига, кўзларнинг ўрганиб қолишига, миянинг ушбу ҳолатларни нормал қабул қилишига сабаб бўлади, – дейди профессор.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)