Қашқадарё вилоятининг Яккабоғ туманида 45 ёшли фуқаро ўз жонига қасд қилгани хабар берилди. Бу ҳақда жамоатчиликка маълумот берган маҳаллий блогерлар ишда тумандаги 94-мактаб директорининг «қўли борлиги»ни ёзмоқда.
«Дарё» мухбири ушбу вазиятга аниқлик киритиш мақсадида 94-мактаб директори билан суҳбатлашди.
Туманда кимлиги ҳам номаълум бўлган блогер менга шундай айб қўйяпти. Аслида воқеа рўй берган куни мен шифохонада бўлганман, — дейди Яккабоғ туманидаги 94-мактаб директори Маҳмуд ака Раҳматов.
Директорнинг аниқлик киритишича, марҳум ва унинг ўртасида жанжал бўлган.
Ўша куни мактабдан чиқиб кетаётганимда марҳум синфдошим йўлимни тўсиб мени ҳақорат қилди. Маст бўлганлиги сабабли аввалига эътибор бермадим. Аммо у онамни, синглимни ҳақорат қилиб сўкингач, у билан жанжаллашдим. У мени ургани учун ўша жойда ҳушимни йўқотганман. Кейин ўзимга келиб, уйга қайтдим ва шифохонага мурожаат қилдим. Ўша куни туман тиббиёт бирлашмасининг шошилинч ёрдам бўлимига ётқизилдим. Синфдошим ўз жонига қасд қилган куни, мен шифохонада бўлганман, — дейди мактаб директори.
Маҳмуд Раҳматовнинг айтишича, марҳум ўлимидан бир кун аввал шифохонага келиб, қилган иши учун ундан узр сўраган.
Ҳақиқатан ҳам раис ва мен, марҳумнинг таклифига кўра шифохонага боргандик. Марҳум синфдоши Маҳмуд акадан узр сўрамоқчилигини айтди ва бизни олиб шифохонага ҳам борганди, — дейди мактаб директорининг гапини тасдиқлаган ҳоким ёрдамчиси Баҳром Бобоқулов.
Баҳром Бобоқуловнинг қўшимча қилишича, бу воқеа бўйича МФЙ раиси ва ҳоким ёрдамчиси туман прокуратурасига чақиртирилиб, тергов ҳам қилинган.
«Дарё» воқеа юзасидан вилоят прокуратураси ахборот хизматига мурожаат қилиб, қўшимча ахборот сўради. Масъул айни пайтда унда бу ҳақда ахборот йўқлигини тез орада бу хусусида батафсил маълумот берилишини айтди.
Мавзуга доир:
Изоҳ (0)