UzAuto Motors компанияси Chevrolet Lacetti, Cobalt, Damas ва Labo автомобилларига шартномалар қабул қилишни вақтинча тўхтатишини эълон қилди. Бу ҳақда компаниянинг харидорларга расмий мурожаатида айтиб ўтилди.
«Ўзбекистонда автомобилларга бўлган талабнинг аномал ўсиши ва глобал муаммолар кучайганини ҳисобга олиб, компания бундай шароитда бошқа автомобиль ишлаб чиқарувчилар томонидан қўлланилган йўлдан боришни тўғри деб ҳисоблайди ва Chevrolet Lacetti, Cobalt, Damas ва Labo автомобилларига шартномалар қабул қилишни вақтинча тўхтатади. Бу ўз навбатида барча саъй-ҳаракатни аввал тузилган шартномалар бўйича автомобиль ишлаб чиқаришга йўналтиради», — дейилади мурожаатда.
Компания ўз мижозларидан вазиятни тушунишни сўраб қолган. Таъкидланишича, ҳозирги шароитда UzAuto Motors’нинг асосий мақсади аввал тузилган шартномалар бўйича ўз мажбуриятларини бажаришдан иборат.
«Сизнинг қўллаб-қувватлашингиз билан тез орада юзага келган вазиятни енгиллаштиришимизга ҳамда ушбу автомобиль моделлари учун шартномалар қайта йўлга қўйилишига ишонамиз», — дея ўз мурожаатига хулоса ясаган компания.
Damas ва Labo’га шартномалар тузиш 13 декабрдан бошлаб тўхтатилгани, ундан аввалроқ Lacetti ва Cobalt контрактацияси ҳам тўхтатилгани маълум бўлган, бироқ бу бўйича расмий баёнот берилмаган эди.
Изоҳ (0)