Теҳронда суд ҳокимияти бир неча ойлардан буён давом этаётган норозилик намойишларида қатнашган 400 кишини турли қамоқ муддатларига ҳукм қилди. Бу ҳақда Яқин Шарқ ОАВлари хабар бермоқда.
«Теҳрон вилоятида тартибсизликлар ҳақидаги иш бўйича эшитувларда 160 киши беш йилдан ўн йилгача, 80 киши — икки йилдан беш йилгача, яна 160 киши — икки йилгача муддатга қамалди», — деди Теҳрон бош прокурори Али Алкасий Меҳр.
Эронда сўнгги бир ҳафта ичида икки киши тартибсизликларда қатнашиб, хавфсизлик кучлари ходимларига ҳужум қилгани учун қатл этилди.
Аввалроқ Эрон президенти Иброҳим Раисий ҳукумат хавфсизлик хизматлари ходимларининг ўлимига сабаб бўлган хатти-ҳаракатларни амалга оширган намойишчилар топилиб, жазоланишини айтганди. Раисийнинг сўзларига кўра, норозилик намойишларини қўллаб-қувватлаётган Ғарб мамлакатлари «янги қўшма уруш» ёрдамида Эрон жамоат тузумига путур етказишга уринган, аммо Эрон халқи бунга дош бера олган.
Эронда 17 сентябрдан бери давом этаётган намойишларда 18 000 га яқин одам ҳибсга олинди. Ҳозиргача олти киши ўлимга ҳукм қилингани маълум. 469 нафар намойишчи ва 61 нафар хавфсизлик кучлари аъзоси эса ўлдирилган.
Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Тартибсизликлар оқибатида, Эрон Миллий хавфсизлик кенгаши маълумотларига кўра, аллақачон 200 дан ортиқ одам ҳалок бўлган. Ислом инқилоби посбонлари қўмондони Сердар Гажизода 300 нафар қурбон ҳақида, Иран Human Rights ҳуқуқни ҳимоя қилиш ташкилоти эса 448 нафар қурбон ҳақида маълум қилган.
Эрон олий етакчиси Али Ҳомейний аввалроқ намойишлар АҚШ ва Исроил томонидан режалаштирилганини айтганди. Америка президенти эса ноябрда Вашингтон «Эронни озод қилиши» ҳақида гапирганди. Бунга жавобан, Раисий Эрон 43 йил аввал — 1979 йилги Ислом инқилоби чоғида озод этилганини таъкидлаган.
Изоҳ (0)