БМТ бош котиби Антониу Гутерришнинг ўринбосари Мартин Гриффиц Херсонга ташриф буюрди. Бу ҳақда БМТ бош котиби вакили Стефан Дюжаррик маълум қилди.
БМТ ташриф тафсилотларини келтириб ўтмади. Гриффиц бош котибнинг гуманитар масалалар бўйича ўринбосари ва фавқулодда ёрдам координаторидир.
Херсон вилояти губернатори вазифасини бажарувчи Владимир Салдо ташкилот вакили Россия давлат чегарасини кесиб ўтиш тартибини бузганини айтди.
«Бугун Херсонга БМТ бош котибининг гуманитар масалалар бўйича ўринбосари Мартин Гриффиц келди. Гўёки, БМТнинг гуманитар операциялари самарадорлигига баҳо бериш ва ҳаво совиши фонида шаҳар инфратузилмасига зарар етиши билан боғлиқ муаммоларни ўрганиш учун. Мартин Гриффицнинг асл мақсади — Херсон вилоятининг Россия таркибига кирганини тан олмаётган бутун дунё ҳамжамияти номидан ҳаракат қилаётганини намойиш қилишдан иборатдир», — деб ёзди Салдо Telegram’да.
30 сентябрь куни Владимир Путин Россия таркибига тўртта янги ҳудудни, шу жумладан, Херсон вилоятини киритиш ҳақидаги шартномаларни имзолаганди. 11 ноябрь куни Россия Днепр ўнг қирғоғидан ўз қўшинларини олиб кетишни якунлади, ўшанда Херсон Украина кучлари назорати остига ўтди.
Изоҳ (0)